16 сентября 2013 г.
Николай Никандрович Анисимов – кун-çулĕн пĕтĕм ĕçĕ-хĕлĕпе вăрманçă. Кăмăла килнĕ профессине шкул саккинчен суйланă та – малтан техникум, унтан институт пĕтернĕ. 1973 çултанпа Вăрнар вăрман хуçалăхĕшĕн ĕçлет: цех мастерĕ, лесничие пулăшаканĕ, лесничий, тĕп инженер, тĕп лесничий. 2004 çултанпа – Вăрнар вăрман хуçалăхĕн директорĕ. Республикăн тава тивĕçлĕ вăрманçи ку тăруçăнхи лару-тăру пирки çапла каласа пачĕ.
Вăрнар вăрман хуçалăхĕн халĕ 33 пин те 174 гектар вăрмана сыхласа-пăхса тăмалла. Коллективра – вăтăр улттăн. Икĕ трактор, ЗИЛ-157 тата тăватă çăмăл автомашина пур. Вăрмансене Авруйĕнчи, Вăрнарти, Калининăри участок лесничествисем асăрхаса тăраççĕ. Калас пулать, лесничийсем – Валентин Николаевич Иванов, Серегй Денисович Михайлов, Юрий Иванович Трофимов – виççĕшĕ те тимлĕ, опытлă, хăйсен ĕçне пĕлекен вăй-халлă çынсем. Уяв ячĕпе мастерсене – Станислав Иванович Политова, Владислав Иванович Григорьева, Юрий Иванович Леонтьева, Сергей Аркадьевич Федорова ырласа асăнса хăварас килет. Шел пулин те, мастерсем çитмеççĕ-ха – паянлăха икĕ çын шыратпăр. Штатпа вĕсем вун çиччĕн пулмалла.
Вăрнар вăрманĕсенче юлашки çулсенче 30-шар гектар йывăç лартнă. Хăрнă вырăнсене хыр, чăрăш, юман калчи тепĕр хут лартса çĕнетнĕ. Лартмашкăн çуллен 30-шар гектар çĕр хатĕрленĕ. Нумай вырăнта сывă тĕп йывăçсене хăварса ыттисенчен тасатнă (пĕлтĕр – 250 гектар, кăçал – 210). Касма пăхнă делянкăсене кăçал 620 гектар хатĕрленĕ. 30 гектар çинчи питомникре пиллĕкĕн вăхăтлăх çынсем (сезонниксем) ĕçлеççĕ. Кăçал унта 3,5 гектар çинче 600 пин калча ÿснĕ. Хамăр районти граждансен ыйтăвĕсене тивĕçтерсе, кăçал ку тĕле кил-çурт нуши валли 6.156 кубла метр йывăç сутнă.
Вăрман текех кирлĕ мар пек курăнсан та, йывăç лартакансем кăна мар, ăна вăрттăн касса вăрлакансем те пур-ха. Кăçал вун ултă протокол çырма тиврĕ. Закона пăсса хăтланнăшăн 10.700 тенкĕ тÿлеттернĕ. Административлă йĕркепе 18.000 тенкĕ штраф хунă. Пушар хăрушлăхĕ тунăшăн икĕ тĕслĕхпе 3.000 тенкĕ шыраса илнĕ. Аренда договорне пăснăшăн 1000 тенкĕ, суту-илÿ договорĕн условине пăснăшăн 3000 тенкĕ тÿлеттернĕ. Пĕр çулхине вăрмана хĕвел тухăç енче тăхăр гектар ытла çунтарчĕç. Кунашкал инкеке хирĕç тăма пирĕн йыш та сахалтарах, техника та çителĕксĕр.
Вăрман пĕтĕм халăх пуянлăхĕ, Çĕр-планета ÿпки теттĕмĕр. Вăрмантан никам та, нихăçан та пуш алăпа тухман. Вăрмана сыхланă, упранă, юратнă. Вăрнар вăрман хуçалăхĕн историйĕ пуян. Тава тивĕçлĕ вăрманçă ятне илнисемех пирĕн вуннăн ытла. Хуçалăх летопиçне Воля Афанасьевич Иванов таврапĕлÿçĕ тĕплĕ çырса кăтартрĕ. Çак пархатарлă пысăк ĕçĕшĕн ăна чунтанах тав тăвас килет.
Вăрнар вăрманçисем кăçал садпа вăрман уйăхлăхне район ĕçченĕсем йышлăн та хастарлăн хутшăнасса кĕтеççĕ.
Н.АНИСИМОВ,
ЧР Çут çанталăк
министерствин
«Вăрнар лесничестви» учрежденийĕн директорĕ.