04 сентября 2013 г.
Хирпуç шкулĕнчен 1977 тата 1978 çулсенче вĕренсе тухнисем тĕлпулу каçне йыхравларĕç. Палăртнă вăхăтра культура çуртне пуçтарăнтăмăр. Икĕ класа вĕрентнисем виççĕн пултăмăр: биологипе химие вĕрентнĕ Тамара Аркадьевна Молчанова, класс етрÿçи пулнă, математикăна вĕрентнĕ Нина Гавриловна Рябчикова тата эпĕ, чăваш чĕлхи вĕрентекенĕ.
Икĕ класĕпе çирĕм пиллĕкĕн. Çĕр çинче çур ĕмĕр пурăнса курнăскерсем, икĕ тĕрлĕ самана туптанăскерсем. Тĕл пулу каçне ирттерме вăйлă хатĕрленни тÿрех курăнать: сĕтелсем тулăх, чечек çыххисем темĕн чухлĕ. Иван Христофоровпа Альбина Пăрчăкан юрăçсем, Петр Романов композитор тата Петр Михайлов конфераньсе çитнĕ. Илемлĕ юрăсемпе киленчĕç тĕл пулу каçне килнисен чунĕсем! Епле савăнса ташларĕç пурте! Мĕн чухлĕ шÿт, кулăш. Артистсене тав туса йĕркеллĕ хăналаса, шÿрпе çитерсе кăмăллăн ăсатса ячĕç.
Тĕлпулу каçĕ малалла пычĕ. Сĕтел хушшинчи калаçу вĕçĕ-хĕррисĕр тăсăлать, хамăр вĕрентсе кăларнă ачасене (халĕ ĕнтĕ вĕсем пурте пысăк çынсем) итлесе тĕлĕнсе ларатпăр. Кашнин çинчен уйрăм очерк çырма пулать, ку статьяра кĕскен çеç пĕтĕмлетер.
Анатолий Матвеев Магаданран килнĕ, ОМОНовец, РФ Правительстви ăна «Хăюлăхшăн» медальпе наградăланă. Валерий Николаевич Петров полици полковникĕ, Шупашкарта пурăнать. Любовь Иванова Мурманск облаçĕнче службăра тăнă, аслă сержант, отставкăна тухнă, кăçал Шупашкарта хваттер илнĕ. Константин Андреев Воркутара шахтăра 22 çул çĕр кăмрăкĕ кăларнă. Пенсие тухнă шахтер сăнĕпе çамрăк курăнать, кĕлетки яштак. Ольга Алексеева Тăвай районĕнче пурăнать, «Акконд–Агро» фирма цехĕнче ĕçлет, ывăлĕ РФ Патшалăх Думин депутачĕ. Юрий Иванов – Вăрнарти суту-илÿпе кану центрĕн тата «Людмила», «Мила» магазинсен хуçи. Юрий Феофанов Вăрнарти 1-мĕш шкулта физикăпа математика предмечĕсене вĕрентет. Любовь Харитонова Кострома хулинчи шкулта физкультура урокĕсене ертсе пынă, пенсие тухнă педагог халĕ Хирпуçĕнчи «Людмила» магазинта ĕçлет. Наталья Миронова ача сачĕн воспитателĕ. Валерий Петрович Николаев 1996 çултанпа Çĕнĕ Шупашкарти «ЖБК–2» завод директорĕ, «Раççей хисеплĕ строителĕ» ята тивĕçнĕ. Ку предприятире 600 ытла çын ĕçлет, вĕсенчен пĕри – Зоя Иванова. Юрий Анатольевич Васильев – строитель, маттурскер, лайăх организатор, Шупашкартан артистсен ушкăнне илсе килекенĕ те вăлах. Валерий Петров «Автодорсервисра» тăрăшать. Михаил Волков кĕперсем хывакан бригадăра ĕçлет. Людмила Ефремова (Львова), Елена Плотникова, Любовь Петрова тата Валентина Васильева хăйсен пурнăçне медицинăпа, çынсен сывлăхне сыхлассипе çыхăнтарнă. Галя Максимова кондитер, Мускавра ĕçлет, хăйĕн нушисем çинчен куççуль витĕр каласа пачĕ. Светлана Аникина Ульяновскра тĕпленнĕ, тĕп универмагра лифтерта тимлет. Лиза Петрова Çĕрпÿ районĕнче, хурт-хăмăр ăсти. Хусанти культура институтне пĕтернĕ Олег Петров ялта ашшĕ-амăшĕн килĕнче пурăнать. Валерий Смирнов та Çĕпĕртен тăван килне таврăннă. Галина Платонова, Ираида Степанова тата Виталий Спиридонов тахçантанпах Мускавра ĕçлесе пурăнаççĕ.
Хамăрăн выпускниксемпе тĕл пулнăшăн эпĕ питĕ савăнтăм. Мăнаçланма та юрать: мĕн чухлĕ вăй хунă вĕсем хăйсен пурнăç çулне хывма, телейлĕ пурăнма, çемйисене тĕрĕс-тĕкел упрама. Епле пултаруллă вĕсем пирĕн. Яланах таса-сывă çÿрĕр, телейлĕ пурăнăр, малалла çирĕп утăр. Тавтапуç сире туслăха упранăшăн, ĕçре маттур пулнăшăн, тăван ялпа тăван шкула манманшăн, хăвăра вĕрентнĕ учительсене хисеплесе тĕл пулу каçне чĕнсе чыс тунăшăн.
И.ФЕОФАНОВА.
Хирпуç.