02 сентября 2013 г.
Вĕрентекенсен тĕп канашлăвĕнче
Вĕрентекенсен августри конференцийĕ кăçал та тулли зал пуçтарчĕ. Поселенисем хушшинчи культурăпа кану центрĕн фойине чечек композицийĕсемпе илемлетнĕ. Конференцие килнисем ача-пăча пултарулăх çурчĕн тата ÿнер шкулĕн вĕренекенĕсен ĕçĕсемпе киленсе паллашрĕç.
Педагогсен çулталăкри тĕп форумне район администрацийĕн пуçлăхĕ Леонид Николаев, Чăваш Патшалăх Канашĕн депутачĕ Владимир Свешников хутшăнчĕç.
Кăçалхи конференци «Федераллă патшалăх вĕрентÿ стандарчĕсен йĕркипе ачасене воспитани парассин лару-тăрăвĕ тата аталану çул-йĕрĕсене палăртасси» темăпа иртрĕ. Вĕрентÿпе çамрăксен политикин пайĕн пуçлăхĕ Николай Иванов хăйĕн докладне сентябрĕн 1-мĕшĕнчен вĕрентÿ çинчен калакан федераци тата республика саккунĕсем вăя кĕнинчен пуçларĕ. Пахалăхлă пĕлÿпе воспитани принципĕсене шкул çулĕчченхи тата пĕтĕмĕшле вĕрентĕвĕн патшалăх стандарчĕсенче аван палăртнă, терĕ вăл. Вĕренес туртăм кĕçĕн ÿсĕмре çуралнине каларĕ. Паянхи куна районти 15 ача садне 1229 ача çÿрет. Шкулсем çумĕнче уçнă 37 ушкăна – 474-ăн. Черетре 254 ача. Çитес çул районта 145 ача вырнаçмалăх садик уçма палăртнă.
Шкулсенче воспитани ĕçĕ ытларах класс ертÿçи çине тиенет, палăртрĕ Николай Никитич. Вĕсене валли квалификацие ÿстерекен курссем, тĕрлĕ семинарсем йĕркелеççĕ. Çулсеренех «Самый классный классный» конкурс иртет. Вăрнарти 2-мĕш шкул учителĕ Ольга Валерьяновна Физер кăçал унăн республика тапхăрĕнче иккĕмĕш вырăн йышăнчĕ.
Николай Иванов çавăн пекех тивĕçлĕ граждансем çитĕнтерес ĕçре патриотизм воспитанийĕ, сывă пурнăç йĕркине тытса пыни, вĕрентекенсем çитĕнекен ăрăва ырă тĕслĕх кăтартни пысăк вырăн йышăннине палăртрĕ.
Район администрацийĕн пуçлăхĕ Леонид Николаев вĕрентекенсене саламланă май, вĕрентÿ пахалăхĕпе шкулсенчи ача шучĕ тачă çыхăннине каларĕ. Шкулсене ачасен йышĕпе укçа-тенкĕпе тивĕçтернĕ май, кашни вĕрентÿ учрежденийĕннех вĕренекенсене хăйсем патĕнче хăварма тăрăшмалла, çакна валли вĕрентÿ шайне ÿстермелле, терĕ вăл. Вĕрентекенсене шкул территорийĕсене тирпей-илем кĕртес ыйтăва та тимлĕхре тытма сĕнчĕ.
Чăваш Патшалăх Канашĕн депутачĕ Владимир Свешников пултаруллă учительсене патшалăх наградисемпе чысларĕ. Чăваш Республикин вĕрентÿпе çамрăксен политикин министерствин Хисеп грамотисене Вăрнарти 2-мĕш шкулти акăлчан чĕлхи учителĕ Ольга Физер, ача-пăча пултарулăх çурчĕн преподавателĕ Николай Есенцев, Малти Ишекри шкул директорĕ Светлана Павлова, Вăрман Кипекри тата Санарпуçĕнчи шкул директорĕсен заместителĕсем Алина Андреева тата Галина Федорова, Вăрнарти 1-мĕш тата 2-мĕш, Калининăри шкулсенчи кĕçĕн класс учителĕсем Альбина Павлова, Елена Судова тата Ольга Андреева, Вăрнарти 1-мĕш шкулти математика учителĕ Елена Ананьева, «Солнышко» ача сачĕн воспитателĕ Маргарита Степанова, вĕрентÿпе çамрăксен политикин пайĕн тĕп бухгалтерĕ Зинаида Ашмарина тивĕçрĕç.
Калининăри шкул директорне Татьяна Ефимована «Единая Россия» политика партийĕн регионти уйрăмĕн Тав çырăвне пачĕç. Ăна, çавăн пекех ку шкулти кадет класĕн ертÿçине Лев Ефимова, Вăрнарти 2-мĕш шкулти ОБЖ учительне Радик Мингазова министерствăн Тав çырăвĕсемпе чысларĕç.
Вĕрентекенсен профсоюзĕн республикăри комитечĕн грамотисене ача-пăча пултарулăх çурчĕн директорĕ Любовь Максимова, Çавалкасри «Сеспель» ача садĕнчи профсоюзăн пирвайхи организацийĕн председателĕ Ирина Петрова илчĕç.
Вĕрентÿ ĕçченĕсем те – Калининăри шкул директорĕ Татьяна Ефимова, Чăрăшкас Хирлепри шкулти физкультура учителĕ Ирина Петрова, Вăрнарти 1-мĕш шкулти истори учителĕ Ирина Малицкая, Вăрнарти 2-мĕш шкулти акăлчан чĕлхи учителĕ Ольга Физер, «Солнышко» ача сачĕн ертÿçи Ирина Львова, çавăн пекех районти историпе краеведени музейĕн директорĕ Елена Шарипова – ачасене воспитанипе пĕлÿ парас ĕçри опытпа паллаштарчĕç. Конференцире яланхиллех вĕренÿ çулне чи лайăх хатĕрленĕ шкулсене, кабинетсене, опытлă участоксене палăртрĕç, шкул ачисен спартакиадине пĕтĕмлетрĕç, çĕнтерÿçисене парнесем пачĕç.
Л.ИВАНОВА.