28 августа 2013 г.
Район администрацийĕн пуçлăхĕ Леонид Николаев кашни ĕç эрнинех планеркăран пуçлать. Хальхинче вăл малтанах вырма ĕçĕсем çинчен каларĕ. Иртнĕ эрнере чылай ял хуçалăх предприятийĕ тĕш тырăсемпе пăрçа йышши культурăсене вырса пĕтернĕ. «Победăра» пысăках мар лаптăк юлнă. «Мураты» ял хуçалăх кооперативĕнче тата Алексей Игнатьев фермер хуçалăхĕнче çĕр улми кăларма тытăннă. Леонид Николаев агротехника срокĕпе кĕрхисене вăхăтра акса хăвармаллине асăрхаттарнă. Планра – 6 пин гектар, хальлĕхе 2 пин гектар акнă.
Район администрацийĕн пуçлăхĕ Вăрнарта тасатмалли сооруженисем тăвас ыйтăва та хускатнă. Кивви хăй ĕмĕрне ĕçлесе ирттернĕ. Планра – ун проектне хатĕрлесси. Кашни пысăк предприятирех вырăнта хăйĕн тасатмалли сооруженисем пулмалла. Ку енĕпе опытпа паллашма ЖКХ тытăмĕн ертÿçисен ушкăнĕ иртнĕ эрнере Владимир хулинче пулнă.
Планеркăра çавăн пекех çут çанталăк газĕн парăмĕсем пирки те калаçнă. Ун сумми 11 миллион тенке яхăн. Вăл пурăнмалли çурт-йĕр фондне ăшăтма парса тăракан çут çанталăк газĕшĕн пухăннă. Парăмсене çитес çулхи августчен реструктуризацилеме «ТеплоКомфорт» тулли мар яваплă обществăпа килĕшĕве алă пуснă.
Районăн тĕп больницин ĕçĕ-хĕлĕпе паллаштарнă май Николай Тинюков тĕп врач больница корпусĕсем юсав ыйтнине, кадрсен ыйтăвĕ çивĕч пулнине (12 врач вырăнĕ пушă), аслă ÿсĕмри çынсен диспансеризаци тухмаллине каланă.
Демографи лару-тăрăвĕ пĕчĕккĕн майлашать. Кăçалхи çичĕ уйăхра 252 ача çуралнă, пĕлтĕрхи ку вăхăтринчен 81 ача ытларах. Шел те, пурнăçран уйрăлакансем ытларах – 362 çын, вĕсенчен 90-шĕ – ĕçлеме пултаракан ÿсĕмрисем.
Архив пайĕн ĕçĕпе Лия Тихонова паллаштарнă. Çынсем кунта ытларах ĕç стажне çирĕплетекен документсене ыйтма килеççĕ.
Ку эрнери пысăк пулăм – Пĕлÿ кунĕ. Шкул ачисене çак кунпа яланхиллех район администрацийĕн, предприяти-организаци представителĕсем саламлĕç.
Л.ИВАНОВА