26 августа 2013 г.
Уравăшра çуралса ÿснĕ, халĕ Рункă ялĕнче пурăнакан Лидия Владимировна Алексеева (хĕр чухнехи хушамачĕ Федорова) сентябрĕн 3-мĕшĕнче 80 çул тултарать.
Лидия Владимировна халăха вĕрентес ĕç отличникĕ, 1976 çулта ЧР Тава тивĕçлĕ учителĕ хисеплĕ ята тивĕçнĕ. Вăл шкулта чунтан парăнса ĕçленĕ, унăн педагогика стажĕ 53 çул.
Уравăшри вăтам шкула пĕтернĕ комсомолка 1954 çулта Хапăсри вăтам шкулта аслă пионервожатăй пулнă. Çулталăкран çак должноçпах ăна Уравăша куçараççĕ. Ĕçленĕ хушăрах вăл куçăмсăр майпа Чăваш патшалăх педагогика институтĕнче вĕренет, 1962 çулта биологи учителĕн дипломне алла илет.
Хастар учительница шкулта ачасене биологие юратма хăнăхтарнă. Шкул столовăйĕ валли кролик, сысна, уйра кукуруза, выльăх кăшманĕ çитĕнтернĕ. Шкул участокĕ яланах кăтартулли шутланнă. Биологи кабинечĕ оранжерея пекехчĕ. Лидия Владимировнан ĕç опычĕпе паллашма районти биологи учителĕсем Уравăша çÿренĕ, паха ĕçе курса тĕлĕннĕ.
Тепĕр 30 çул Лидия Владимировна Канаш районĕнчи Аччари вăтам шкулта ĕçлет. Унăн ÿсĕмĕсене часах курса ырăпа хаклаççĕ. 1980 çулта Л.В.Алексеевана ЧАССР Верховнăй Совечĕн депутатне суйлаççĕ (Канаш районĕнчи 116 Ачча суйлав округĕ). Депутат тăрăшнипе Çĕнĕ Ачча ялĕнче 140 ача вырнаçмалăх ача сачĕ çĕкленсе хута каять (халĕ ку çуртра шкул уçнă).
Тĕрлĕрен сборсем, ĕçпе кану лагерĕ, обществăллă ĕçсем, тематика каçĕсем йĕркелесси, депутат пулнă май тĕрлĕрен ыйтупа çÿремеллисем, класс ертÿçин тивĕçĕсене пурнăçласа пырасси, районти тата республикăри биологсен семинарĕсенче тухса калаçса ĕç опычĕпе паллаштарасси, Пĕтĕм Союзри ял хуçалăх выставкине хутшăнасси – пурне те çÿллĕ шайра ирттерме пултарнă Лидия Владимировна.
Унăн мăшăрĕ – Николай Алексеевич Алексеев – математика учителĕ, нумай çул Аччара шкул директорĕн заместителĕ пулчĕ. Иккĕшĕ вĕсем питĕ килĕшÿллĕ пурăннă, икĕ ача пăхса ÿстернĕ. Ывăлĕ Сергей Хусанта авиаинститут пĕтерчĕ, Шупашкарти приборсем тăвакан заводра инженер-конструктор пулса тимлет. Хĕрĕ Таня врач-терапевт, Норильск хулинче ĕçлесе пурăнать.
Тивĕçлĕ канăва тухнă пенсионерка, ĕç ветеранĕ, ачисем пулăшнипе килти хуçалăха юхăнтармасăр йĕркеллĕ, çирĕп тытса пырать. Ĕçчен те типтерлĕскерне ялта хисеплеççĕ, унăн авторитечĕ пысăк. Çынсемпе вашават калаçать, радио итлет, телевизор пăхать, хаçат-журналти хыпарсемпе ыттисене паллаштарать.
Лидия Владимировнан кун-çулĕ мухтавлă. Ĕçленĕ тапхăрта унăн сăнĕ Вăрнар тата Канаш районĕсен Хисеп хăми çинчен татăлман. 80 çулхи юбилей ячĕпе ăшшăн-ăшшăн саламласа ăна тата нумай çул пурăнма ырлăхпа телей, çирĕп сывлăх сунатпăр.