21 августа 2013 г.
– Кĕрхи ĕçсем хăй вăхăчĕпе ăнăçлă ĕлкĕрсе пыраççĕ. Тунти кун ыраш акса пĕтертĕмĕр, – евитлерĕ «Хорнзор» ял хуçалăх предприятийĕн пуçлăхĕ Федор Григорьевич Кузьмин. – Кĕр тыррине 100 гектар пулăхлă лаптăкра вырнаçтартăмăр.
Ку яхăнти рапортсем кăмăла çĕклеççĕ темелле.
– Ырашпа тулă 240 гектар акрăмăр, – терĕ Çăкаллă Явăшри ял хуçалăх кооперативĕн ертÿçи Геннадий Петрович Спиридонов. – Вырмаллине пĕтĕмпех пухса кĕртрĕмĕр. Пирĕн комбайнерсем халĕ Максимов фермер хуçалăхĕнчи тырра кашлаттараççĕ. Михаил Яковлевич вĕсене лайăх пăхать, мухтаса хавхалантарма пĕлет. Ку эрнере çĕрулми кăларма тухатпăр. 270 гектар йышăннă уйсене виçĕ комбайн кăларать. Лаптăксенче çĕр улми аврине çулса хатĕрленĕ, комбайнсем çăмăлраххăн çÿреме пултараççĕ.
Геннадий Петрович ĕнер район делегацийĕпе пĕрле Украинăри хамăрпа туслă çыхăну тытакан Золотоношăна тухса кайрĕ.
Вырма паян-ыран вĕçленме пултарать. Уй-хирте 50 ытла комбайн кĕрлет. Ку ĕçе Кольцовка, Çавалкас, Çĕрпел, Мăн Турхан тăрăхĕсенче çитес вăхăтра вĕçлĕç. «Тырпула 260 гектар çинчен пĕр тăкаксăр пухса илтĕмĕр», – тет Сăрьелти фермер хуçалăхĕн ертÿçи Валентин Николаевич Павлов. Карл Маркс ячĕллĕ хуçалăхри Андрей Виссарионович Романов «Агрос-580» комбайнĕпе 8.680 центнер вырса çапнă. Вăрнарти аш-какай комбинатĕнчи Николай Тихонов (15.710 центнер), Сергей Аввакумов (13.000 центнер) яланхиллех пуринчен те малта. Кусем иккĕшĕ Германире туса кăларнă «Класс» йышши комбайнсемпе выраççĕ. Вĕсемпе пĕрле Геннадий Краснов «Агрос-580» комбайнпа ĕçлет, юлташĕсенчен ÿксе юласшăн мар. (Вăл 11750 центнер пухнă). Акционерлă ку обществăн кăçал 2300 гектар кĕр тырри акмалла. Ку тĕлĕшрен ĕç-пуç хĕрсе пырать. Районĕпе пĕтĕмпе ултă пин гектар акма пăхнă. «Знамя» хуçалăхра 100 гектар, «Агрохмельте» 70 гектар акнă. Çавалкассем, çĕрпелсем, «Санар» хуçалăх акаççĕ.
Пухса кĕртмелли 15.444 гектартан 1.276 гектарне кукурузăпа йышăннă, ăна тĕшĕлĕх пултарма палăртнă. Тырпул тухăçĕ районĕпе 21 центнер ытларах. Карл Маркс ячĕллĕ хуçалăхра гектар пуçне кĕрхи тулă 38,9 центнер, ыраш 28 центнер тухнă. Тухăç санарсен – 25, çĕрпелсемпе тукайсен – 24 центнер.
Хăш-пĕр хуçалăхсем кĕрхи çĕртме сухалаççĕ, хăмла татма хатĕрленеççĕ.
М.ВАСИЛЬЕВ