19 августа 2013 г.
СССР халăх артисчĕ, чаплă юрăç, Мускаври Пысăк театрăн паллăран-паллă солисчĕ, тĕнче шайне улăхса халăхсене хытă тĕлĕнтернĕ Максим Дормидонтович Михайлов çуралнăранпа 120 çул çитнине унăн тăван ялĕнче, Кульцавра, савăнăçлăн паллă турĕç
Мухтавлă ентешĕмĕр пирĕн районта тата республикăра чăн тивĕçлипе пысăк хисепре. Ун ячĕпе 1991 çултанпа Чăваш патшалăх оперăпа балет театрĕнче çуллен Пĕтĕм тĕнчери опера фестивалĕ иртет. Хальхинче фестиваль М.Д.Михайловăн çуралса ÿснĕ ялĕнче Кульцавра вăл шăпах тĕнчене килнĕ кун пуçланчĕ.
Оперăпа балет театрĕн артисчĕсем симфони оркестрĕпе пĕрле хĕрĕхĕн килсе çитнĕ. Чаплă пухура Культура керменĕ умĕнче артистăн бюст-палăкĕ патне ЧР культура тата национальноçсен ĕçĕсен тата архив ĕçĕсен министрĕ Вадим Ефимов, район администрацийĕн пуçлăхĕ Леонид Николаев чĕрĕ чечексен карçинккисене вырнаçтарчĕç, асăнупа чыс сăмахĕнче М.Михайловăн культурăри вышкайсăр пысăк пай-тÿпине мухтарĕç. Максим Дормидонтович Пысăк театр сцени çине шăпах 80 çул каялла, шăпах çак кун тухнă, терĕ министр. Леонид Григорьевич ЧР оперăпа балет театрĕнче Вăрнар енĕн таланчĕсем те пуррине палăртрĕ, паян акă Мария Елановăпа (Çĕрпел хĕрĕ) Валентина Смирнова (Кÿлхĕрри хĕрĕ) юрлаççĕ, терĕ.
Симфони ансамблĕн дирижерĕ, ЧР искусствăсен тава тивĕçлĕ деятелĕ Ольга Нестерова СССР халăх артисчĕн пĕр хăйне кăна еверлĕ сасси пирки питĕ интереслĕ каласа кăтартрĕ. Культура керменĕнче «Шывармань» (Ф.Васильев), «Пиковая дама» (П.Чайковский), «Борис Годунов» (М.Мусоргский) тата ытти оперăсенчи арисем янăрарĕç. Пĕтĕм тĕнчери конкурссен лауреачĕсем Татьяна Прытченкова, Татьяна Тойбахтина, Елена Соколова, Иван Снигирев, Пĕтĕм тĕнчери конкурссен дипломанчĕсем Андрей Николаев, Сергей Кузнецов, Чăваш ен тава тивĕçлĕ артистки Маргарита Финогентова юрларĕç.
Фестиваль уявне чаплă шайра йĕркеленĕшĕн пухăннисене юлашкинчен Кульцав ял тăрăхĕн пуçлăхĕ Евгений Нараткин чунтан-вартан тав турĕ.
М.ВАСИЛЬЕВ