12 августа 2013 г.
Сăпайлă та хисеплĕ, мухтава тивĕçлĕ хĕрарăм пурăнать Калинино салинче.
Вăл – Зоя Павловна Александрова. 80 çул каялла Вăрмар районĕнчи Шăхаль ялĕнче Биктимировсен йышлă çемйинче çуралнă. Пĕчĕкренех тухтăр пулма ĕмĕтленнĕскер, Хусанти медицина институтĕнче ача-пăчана сиплекен пулма вĕренет. 57 çул каялла ăна Калинино районĕнчи (ун чухне республикăра çавăн пек район пулнă) тĕп больницăна ĕçлеме яраççĕ.
Амăшĕ пулма хатĕрленекен е çуратма ĕлкĕрнĕ хĕрарăмсене тата пĕчĕк ачасене чир-чĕртен сыхлас, асăрхаттарас тесе 26 çул вăхăта та, чунне-чĕрине те шеллемен. Чирлисем патне темле çанталăкра та çитсе кирлĕ пулăшу панă.
Пултарулăхне кура Зоя Павловнăна коллектива ертсе пыма шанаççĕ. 16 çул çак яваплă ĕçре тăрăшать вăл, больница хуçалăхне çĕнетсе çирĕплетет, çĕнĕ корпус çĕклеттерет.
Çынсене сыватас ĕçре хастарлăх кăтартнăшăн ăна «Чăваш Республикин тава тивĕçлĕ врачĕ» ят панă. Унăн кăкăрĕ çинче «Халăхсем хушшинчи туслăх» орденпа икĕ медаль ялкăшаççĕ.
Обществăлла ĕçрен те аякра тăман вăл – темиçе хутчен ăна вырăнти депутата суйланă. Пенсие тухсан тата ултă çул кунтах врачра тăрăшнă. Мăшăрĕпе икĕ ывăл çитĕнтерсе пурнăç çулĕ çине тăратнă.
Тăххăрмĕш теçеткене кайрĕ пулин те Зоя Павловна Александрова маттур-ха, килти, анкартинчи ĕçсене хăех тăвать, пахча çимĕç, чечексем çитĕнтерет. Тĕп хулара пурăнакан ачисемпе мăнукĕсем те килсе пулăшаççĕ.
– Пирĕн сывлăх, пурнăç хамăртан килет, сиенлĕ йăлапа çыхланмалла мар кăна, – тет ĕç ветеранĕ Зоя Александрова.
Вениамин ИВАНОВ