12 августа 2013 г.
Кашни çын пурнăçĕнчех спорт мĕнле те пулин вырăн йышăнать, кам шкул вăхăтĕнче физкультура урокĕсене кăмăлланă, кам халĕ те ÿт-пĕве çирĕплетме чупать е тĕрлĕ упражненисем тăвать, кам вара пĕтĕм пурнăçне профессионаллă спортпа çыхăнтарнă. Çавăнпа та паян уявлакан Физкультурник кунĕ кашни çыншăн çывăх пулма тивĕç.
Çак уяв совет тапхăрĕнче анлă вăй илнĕ, «Сывă ÿт-пÿре – сывă ăс-тăн» лозунга вăйлă пропагандăланă. Физкультурник кунне хамăр районта та çулсеренех чыслăн уявлаççĕ. Ятлă спортсменсем, сывă пурнăç йĕркин тусĕсем хăйсен вăйне-кăмăлне кура тĕрлĕ тĕссенче тупăшаççĕ.
Кăçалхи уява та район спортсменĕсем пысăк çитĕнÿсемпе кĕтсе илчĕç. Тĕрлĕ шайри ăмăртусенче вĕсем Вăрнар ятне çÿле çĕклерĕç. Пĕтĕмпе вĕсем кăçал район, республика шайĕнчи 66 спорт мероприятине хутшăннă: йĕлтĕр йĕрĕнче, çăмăл атлетикăра, йывăр атлетикăра, кире пуканĕ йăтассинче, полиатлонра, волейболра, футболта, аэробикăра, ирĕклĕ майпа кĕрешессинче районăн спорт енчĕкне медальсемпе пуянлатнă.
Ятран асăнас пулсан Вăрнар чысне паян çак спортсменсем чыслăн çĕклеççĕ: йĕлтĕр спортĕнче – Александр Романов, Ирина Тикинева, Александр Политов, Сергей Политов, Эльвира Чугунова, Владимир Тикинев, Иван Васильев, ыттисем. Пурте тенĕ пекех кăçал пĕрремĕш спорт разрядне тултарма пултарчĕç.
Вăрнар районĕ кăçал республикăри хĕллехи ял спорт вăййисенче пĕрремĕш пулчĕ. Çĕнтерĕве вăрнарсем тĕрлĕ тĕсре тивĕçлипе туптарĕç. Паллах, чи лайăх кăтарту полиатлонистсен. Сергей Политов, Александр Политов, Анна Григорьева, Галина Павлова Чăваш енре чи вăйлă команда пулнине çирĕплетрĕç. Красноярск хулинче иртнĕ Пĕтĕм Раççейри хĕллехи ял спорт вăййисенче республика чысне хÿтĕлесе улттăмĕш вырăн йышăнчĕç.
Республикăри вăйăсенчи çĕнтерĕве механизаторсем – Надежда Семеновапа Юрий Сорокин, доярсем – Алевтина Тарасовапа Елена Михайлова, кире пуканне йăтакансем – Екатерина Козлова, Екатерина Степанова, Александр Емельянов, йĕлтĕрçĕсем – Владимир Тикинев, Ирина Тикинева, Дмитрий Тикинев тата Эльвира Чугунова, Мăньял Хапăсри Тикиневсен çемйи сумлă тÿпе хыврĕç.
Волейболистсем яланхиллех ăнăçлă ăмăртрĕç. Владимир Иванов, Вадим Кириллов, Александр Трофимов, Андрей Алексеев, Артем Степанов, Николай Прокопьев, Дима Паймулкин, Дима Трофимов, Игорь Шашков республика чемпионачĕн кĕмĕл призерĕсем пулса тăчĕç.
Çăмăл атлетика «çăлтăрĕсем» – Таня Ефимова, Александр Политов, Сергей Политов, Диана Политова, Мальвина Михайлова, Семен Семенов, Юрий Кириков – республикăри, Раççейри ăмăртусен çĕнтерÿ пьедесталĕ çине хăпарма тивĕçрĕç.
Ирĕклĕ майпа кĕрешекенсен те Раççей таран çĕнсе илнĕ медаль-парнисем – вун-шар. Вĕсем – Виталий Трофимов, Юрий Львов, Андрей Павлов, Сергей Васильев тренерсен вĕренекенĕсем: Настя Иванова, Яна Лукина, Роман Львов, Сергей Кириллов, ыттисем.
Сĕтел çи теннисра акă Василий Кокин спорт мастерĕн кандидачĕн, Дима Ергаев пĕрремĕш разряд нормативĕсене тултарнă.
Районти хăш-пĕр предприяти-организацисем сывă пурнăç йĕркине пропагандăлассипе паха тĕслĕх сарассине сумлă тÿпе хываççĕ: район администрацийĕ, Вăрнарти хутăш препаратсен завочĕ, Вăрнар тата Калинино райповĕсем, шалти ĕçсен министерствин «Вурнарский» пайĕ, «Вурнарымежрайгаз», район тĕп больницин ĕçченĕсем. Пур предприяти те вĕсенчен тĕслĕх илнĕ пулсан спорт тусĕсен йышĕ темиçе хут ÿсмелле те. Ярмушка, Калинино, Ершепуç, Çĕрпел, Малти Ишек, Кĕçĕн Кипек, Санарпуç ял поселенийĕсенче массăллă спорта аталантарасси уйрăмах пысăк тимлĕхре.
Мăньял Хапăсри Надеждăпа Юрий Тикиневсем, Владимир Тикинев, Вăрнарти Татьянăпа Владимир Федоровсем, Эьвирăпа Юрий Романовсем, Сергей Политов, Чăрăшкас Хирлепри Иринăпа Владимир Петровсем, Туçи Çармăсри Татьянăпа Сергей Волковсем массăллă пĕр мероприятирен те юлмаççĕ.
«Химик» спорт клубĕ çитĕнекен ăрăва массăллă спорта явăçтарассине çÿллĕ шайра тытса, спорт ĕçне кăтартуллă туса пырать. Унăн футбол командисем, фитнес-аэробика ушкăнĕ – республика ăмăртăвĕсен лидерĕсем.
Районта иртекен ăмăртусенче ял çамрăкĕсен пĕрлештернĕ командисене курма мĕн тери кăмăллă. Эппин, ялсенче хастарсем пĕтмен-ха. Темиçе çул ĕнтĕ вĕсем хăйсен пуçарăвĕпе футбол турнирĕ ирттереççĕ. Кăçал куçса çÿрекен Кубокшăн Пăртас, Элмен Сунар, Пăваяль, Кÿстÿмĕр, Кушлавăш, Санарпуç, Уйкас Кипек, Çĕрпел каччисем тупăшнă. Çĕнтерÿ парнине хальхинче элмен-сунарсем выляса илнĕ.
Физкультурниксем, сывă пурнăç йĕркин çывăх тусĕсем, спорт ветеранĕсем кăçалхипе 74-мĕш хут ирттерекен профессилле уявра çак саманта та аса илмелле: яллă районсем хушшинче Вăрнар районĕ çăмăл атлетикăра, полиатлонра тата волейболра малти вырăнсенчен чакмасть.
Физкультурник кунĕ – ăрусене çыхăнтаракан уяв. Вăл нумай çынна спорт çулĕ çине тăма пулăшать.
С.ЧИКМЯКОВА