12 августа 2013 г.
Ярмушкасен спорт юхăмне аталантарас историйĕ пуян. Вĕсем футбол, волейбол, сĕтел çи теннис енĕпе районта малти вырăнсенчен чакмаççĕ, йĕлтĕр ăмăртăвĕсенче, çăмăл атлетика чупăвĕсенче хастар. Пĕр вăхăт кăна, темиçе çул каялла ял тăрăхĕн пуçлăхне çĕнĕ çын ларсан, массăллă спорт ĕçĕнче ыйтусем сиксе тухнă. Юрать, ку ялтан тухнă пуçаруллă çамрăксем алă усман – виçĕм çул вĕсем «Гвардеец» обществăлла спорт пĕрлешĕвне официаллă йĕркеленĕ.
Çак утăма тума вĕсене ялта спортпа туслă çамрăксем, ачасем нумай пулни, йăлана кĕнĕ турнирсене пăрахăçлас мар тени хистенĕ. Общество председателĕ Олег Васильев, Руслан Яковлев, Геннадий Егоров, Валерий Иванов, Андрей Яковлев, Олег Фомин, Сергей Шикин, Андрей Георгиев предпринимательсем халĕ тăван тăрăхра иртекен кашни мероприятие хатĕрлесе ирттерме пулăшаççĕ. Мускавра пурăнакан Николай Павлович Федоров, тĕп хуламăрăн бокс федерацийĕн вице-президенчĕ, чылай турнирăн спонсорĕ çеç мар, шкул командине темиçе çул ĕнтĕ футбол тумĕсемпе, спорт- инвентарьпе тивĕçтерет. Халĕ «Гвардеец» пĕрлешĕвĕн календарлă планĕпе иртекен хăш-пĕр ăмăртусем шăпах вăл пуçарнипе йĕркеленнĕ. Сăмахран, Аслă Çĕнтерÿ кунĕнчи ял тăрăхĕнчи çăмăл атлетика чупăвĕ.
Кăçал вăл юбилейлă датăпа иртнĕ – ял çыннисем, ытти çĕртен килсе çитнĕ спорт тусĕсем 15-мĕш хут старта тухнă. Унччен чупу трасси Ярмушка – Мачамăш – Ярмушка маршрутпа выртнă, халĕ çăмăл атлетсем Мăн Элмене çити ăмăртаççĕ. Пĕтĕмĕшле çичĕ километр. Паллах, кĕçĕннисемпе аслисем валли çăмăллăхсем пур: 11 çулчченхисемпе 60-тан иртнисем çур дистанцие кăна тухаççĕ.
Тĕрĕссипе, ярмушкасемшĕн халĕ кашни çĕнĕ çулталăк спорт ăмăртăвĕнчен пуçланать. Январĕн 4-мĕшĕнче – Федор Соколов ячĕллĕ сĕтел çи теннис турнирĕ. Вăл тахçанах республика шайĕпе иртет ĕнтĕ. Пĕтĕм ăмăртăва вырăнта йĕркелекенсем, хăйсем шÿтлесе калашле «хура ĕçне» тăвакансем, Георгий Сорокинпа Геннадий Герасимов каланă тăрăх, ку турнира алла кам ракетка тытма пĕлет – пурне те хутшăнтарма тăрăшаççĕ. Çакă ачасен выляс ăсталăхне ÿстерме, вĕсенче ăмăртаслăх туйăма вăратма пулăшать, теççĕ вĕсем.
Февральте Тăван çĕршывăн Аслă вăрçин участникне I степень Мухтав орденĕн кавалерне Артем Яковлевич Яковлева асăнса йĕлтĕрçĕсем старта тухаççĕ. Кăçал унта 158 çын – ярмушкасемсĕр пуçне Шупашкартан, Туçи Çармăсран, Вăрнартан, Калининăран – хутшăннă.
Апрельте «Гвардеец» ЧРСОО Кубокĕшĕн 12 команда волейболла тупăшнă. Тепĕр çĕрте ял поселенийĕпе те пĕр команда пуçтараймаççĕ пулсан, ярмушкасем ав ку турнира тăватă команда таран тăратнă.
Июньте пулă тытаççĕ, октябрьте кире пуканĕ йăтаççĕ (ку тĕсри Ярмушкан пултаруллă çамрăкĕсем Катя Козлова, Катя Степанова, Александр Емельянов район чысне республикăри Хĕллехи ял спорт вăййисенче те тивĕçлĕ хÿтĕленĕччĕ – бронза призерсем пулса тăнăччĕ), декабрьте Иван Куликова асăнса волейбол турнирĕ ирттереççĕ.
Пĕлтĕр кунта районта пĕрремĕш хут велоспорт чупăвĕ иртнĕччĕ. Унта ют регион маунтинбайкерĕсем те хутшăннăччĕ.
Иртнĕ шăмат кун Ярмушка ялĕ каллех массăллă ăмăртусен вырăнĕ пулса тăнă. Кунта спортпа çывăх пулнă, анчах пурнăçран çамрăкла уйрăлнă çынсене асăнса «Памяти друзей» футбол турнирĕ иртнĕ. Аслисен сакăр – «Абызово», Элĕк районĕнчи «Авангард», «Химик-Август», çавалкассемпе сăкăтсен «Воля», «Гвардеец», Пуканкасси, Кивçурт Мăрат ял çамрăкĕсен командисенчен куçса çÿрекен Кубока мăн-элменсем выляса илнĕ.
2000–2001 çулта çуралнă ачасем хушшинче иртнĕ матчсенче ярмушкасем «Химик-Августăн» икĕ тата Пăртас командисене çĕнтерсе Кубока хăйсен аллинчех хăварнă. Командăра – Семен Павлов, Алик Алексеев, Дима Андреев, Кирилл Герасимов, Николай Отрыванов, Дима Павлов, Саша Федоров.
Ярмушкасен çакăнпа та мухтанмалла: ку ялти вунă ача паян «Химик-Август» йышĕпе район чысне республикăра ăнăçлă хÿтĕлет.
– Ачасен спорт туртăмĕ ан пĕттĕр – пирĕн пĕрлешÿ шăпах çак шухăш çинче никĕсленнĕ те ĕнтĕ, – теççĕ Георгий Сорокинпа Геннадий Герасимов. – Пирĕн хамăр хыççăн ĕçлекен те хăвармалла, ялти 20–30 ачаран иккĕш-виççĕшĕ пирĕн ĕçе малалла тăссан та тем пекехчĕ.
Ачасен, паллах, камран тĕслĕх илмелли пур. Ку тăрăхран пысăк спорта тухнă дзюдо енĕпе мастерсем хушшинчи тĕнче чемпионĕ Линда Федорова (Яковлева), унăн мăшăрĕ ку тĕсрех мастерсем хушшинче Раççейĕн виççĕмĕш призерĕ Андрей Яковлев, Раççейĕн Хĕçпăшаллă Вăйĕсен пĕрлештернĕ командин членĕ, çар полиатлонĕ енĕпе спорт мастерĕ Алексей Крылов вĕсене çĕнĕрен те çĕнĕ çитĕнÿсем тума хавхалантараççĕ.
– Паян ачасене аталанма условисем çителĕклĕ, патшалăх шкулсене спортинвентарьпе пулăшсах тăрать. Аса илес пулсан, иртнĕ ĕмĕрĕн 90-мĕш çулĕсенчи ахăрсамана вăхăтĕнче шкулсенче оборудовани пачах та çукчĕ. Физкультура урокĕсене çĕтĕк мечĕке çĕлесе ирттерни те пулнă, унпах футбол та, баскетбол та вылянă, – тет Георгий Геннадьевич.
Шкул ачисен спорт туртăмĕ пысăк пулнинче ун тÿпи питĕ пысăк. Вăл хăй те ăста спортсмен. Унăн ывăлĕпе хĕрĕ те – Ромăпа Карина – тĕрлĕ тĕсре маттур. Унăн вĕренекенĕсем çулсеренех йĕлтĕрпе чупассипе, çăмăл атлетикăра малти вырăнсене йышăнаççĕ.
Геннадий Герасимов та – спортăн пысăк тусĕ. Вăл районăн тĕп физкультурникĕпе Сергей Политовпа пĕрле вĕреннĕ, ăмăртусенче пĕрле тупăшнă. Студент чухнех коньки спорчĕн тренерĕ пулнă.
«Гвардеец» республикăри обществăлла спорт пĕрлешĕвĕн йĕркелÿçисем вара пурте – Геннадий Илларионович Сорокинăн воспитанникĕсем. Ял пуласлăхĕшĕн тăрăшма, йăласене упраса хăварма, аталантарма шăпах çамрăксене вăл вĕрентнĕ.
Ярмушкасем хăйсен тăрăхĕнче вăл е ку спорт тĕсĕн «пурнăçне» тăсма пулăшнă çынсене манмаççĕ. Иртнĕ эрнери турнира акă футбола йĕркелесе яракансенчен пĕри – Комсомольски районĕнче пурăнакан, хăй вăхăтĕнче Ярмушка шкулĕнче ĕçленĕ Вячеслав Всеволодович Скворцова чĕннĕ.
«Яллă вырăнта, паллах, спорта аталантарма çăмăл мар. Укçа-тенкĕ ыйтăвĕ çивĕч. Анчах та халăх хăй хирĕçлемест, ăмăртусене хастар хутшăнать, вĕсене кĕтет пулсан, мĕншĕн пулăшмалла мар;» – тенĕччĕ пĕр калаçура «Гвардеец» пĕрлешĕвĕн председателĕ Олег Витальевич Васильев.
Ярмушкасен тĕслĕхĕпе ытти ялсенче те спорт ĕçне çапла çÿлте тытса пырсан тем пекехчĕ те...
С.ЧИКМЯКОВА