12 августа 2013 г.
Хуçалăхсем хушшинчи «Вурнарская» организаци ĕçченĕсем кĕске вăхăтра тата тепĕр 50 хваттерлĕ çурт çĕклесе лартрĕç. Севернăй тăкăрлăкри 4-мĕш «а» адреспа вырнаçнăскерте халĕ шалти ĕçсене вĕçлесе пыраççĕ.
Чăваш Республикин тава тивĕçлĕ строителĕ Лидия Захарова ертсе пыракан бригада çине тăрсах стенасене, маччасене якатассипе тимлет. Ĕç кал-кал пырать – ушкăнра ăсталăхпа туслăх пĕр тĕвĕре пулни куç кĕретех. Светлана Иванова, Венера Кузьмина, Роза Большакова, Надежда Алексеева, ыттисем ахальтен организаци ертÿçин ырă сăмахне тивĕçмен ĕнтĕ.
План тăрăх ку çурта октябрьте хута ямалла, анчах та строительсен тăрăшулăхне пула çынсем хваттерсен уççисене сентябрьтех илме пултарĕç. Газ çитернĕ, шыв, электричество çути кĕртнĕ, канализаци кăларнă. Шалти ĕçсемпе пĕрлех халĕ кунта çурт çывăхне тирпейлессипе те тимлеççĕ.
Каменщиксен бригади юнашарта, Тракторнăй тăкăрлăкра, çĕкленекен объекта куçнă ĕнтĕ. Пулас 70 хваттерлĕ çуртăн пĕрремĕш хутне туса пĕтернĕ. Графикпа ку ĕçе октябрĕн 10-мĕшĕ тĕлне вĕçлемелле, кун пек хăвăртлăхпа вăй хурсан тăрă витессине вĕсем маларах та пуçлĕç.
Çуртăн 31 хваттерне «Кивĕ çурт-йĕр» программăна кĕнисем валли уйăрнă. Çавăнпа та икĕ подъездне кăçалах, декабрьте, хута яма палăртнă.
Тăрăшуллă коллектив йĕркеленнĕшĕн савăннине пытармасть «Вурнарская» МСО ертÿçи Иван Сандомиров. Кăтартуллă ĕçлекенсене яланах паха тĕслĕх вырăнне хурать. Юлия Владимирова инженер-снабженец вунпĕр çул хушшинче пуян опыт пухнă. Алексей Сивкин, Герман Яковлев, Сергей Якушин, Виталий Арсентьев, Федор Эников, Руслан Михайлов каменщиксем, платниксен бригади – Чăваш Республикин тава тивĕçлĕ строителĕ Виктор Степанов, Сергей Никишов, Юрий Михайлов, водительсем – Виталий Лавров, Юрий Михайлов, Александр Иванов, крановщиксем – Александр Краснов, Виктор Петров, Александр Майков, тĕп инженер Александр Андреев, Зоя Петрова тĕп бухгалтер тата Нина Павлова бухгалтер, Борис Нетроневпа Сергей Капралов сварщиксем ырă сăмаха тивĕçрĕç. Производство пайĕн ертÿçи Андрей Уткин иккĕмĕш çул кăна ĕçлет пулин те ăслăлăхĕпе, тăрăшулăхĕпе палăрма ĕлкĕрнĕ.
Сергей Никифоров аслă мастерăн уйрăмах мăнаçланмалли пур – предприятин Вăрнарти пур çуртне те вăл ертсе пынипе çĕкленĕ.
Организаци çĕнĕ отрасльпе те – технадзорпа – ĕçлеме пуçланă. Хальлĕхе ун асăрхавĕнче – Вăрмарти, Вăрнарти 2-мĕш, Мăн Явăшри, Хирпуçĕнчи шкулсем тата Йĕпреçри ача сачĕ.
Паллах, ыйтусемсĕр май çук. Чи çивĕччисенчен пĕри – çурт тума çĕр уйăрасси. Çак кунсенче кăна ку ыйтупа «Вурнарская» МСО ертÿçи Иван Сандомиров район администрацийĕн пуçлăхĕпе Леонид Николаевпа тĕл пулнă.
Профессилле уяв умĕн объектсенче ĕç уйрăмах хавхалануллă пынăн туйăнать. Строительство шавĕ Вăрнар ÿссе пынине палăртать.
С.ЧИКМЯКОВА