07 августа 2013 г.
Район администрацийĕн пуçлăхĕ Леонид Николаев Вăрнарти 2-мĕш тата Хирпуçĕнчи шкулсенче пулса вĕсем çĕнĕ вĕренÿ çулне мĕнле хатĕрленнипе паллашнă
Июлĕн 23–31-мĕшĕсенче районти вĕренÿ учрежденийĕсенче йышăну комиссийĕ ĕçлерĕ. Пур шкул та çĕнĕ вĕренÿ çулне тивĕçлипе хатĕрленнĕ, хăшĕсенче юсав ĕçĕсене вĕçлесе пыраççĕ.
Вăрнарти 2-мĕш шкулта пластик чÿречесем лартас ĕç пырать. Тĕплĕ юсав ирттерме кунта 3,2 миллион тенкĕ уйăрнă. 1 миллион ытларах тенкине пĕрремĕш хутри коридора юсама янă. Кунта стенасене пĕтĕмпех çĕнĕ «тум» тăхăнтартнă, вĕсене çунман ятарлă хутăшпа витнĕ. Иккĕмĕш хутри йывăç урая кафель плитасемпе улăштарнă, çĕнĕ алăксем лартнă. Спортзалта пысăк ĕç тунă: урая, чÿречесене çĕнетнĕ.
Вĕрентÿпе çамрăксен политикин пайĕн пуçлăхĕпе Николай Ивановпа тата шкул директорĕпе Сергей Ильинпа калаçнă май, район администрацийĕн пуçлăхĕ юсав ĕçĕсене пысăк хак панă, пластикран тунă шыв пăрăхĕсене хуплама, картлашкасене тимĕр угольниксемпе çирĕплетме сĕннĕ.
Хирпуçĕнчи шкула юсама 588,7 пин тенкĕ уйăрнă. Ку укçа санузелсене юсама, кабинетсенче раковинăсем вырнаçтарма, шыв системине тума кайнă. Çывăх вăхăтра котельнăй тăррине улăштарма палăртнă. Шкулăн тăрри те пысăк юсав ыйтать, анчах та Леонид Николаев ăна кăçалах юсама май çуккине, ку ыйтăва çитес çул татса парассине каланă.
Л.ИВАНОВА