07 августа 2013 г.
Çак шăмат кун, августăн 10-мĕшĕнче, Вăрнарти «Химик» стадион пурне те Физкультурник кунне йыхравлать. Районти тĕп физкультурник – район администрацийĕн социаллă аталану пайĕн пуçлăхĕн заместителĕ Сергей Политов пĕлтернĕ тăрăх, вăл тĕрлĕ спорт тĕсне пĕрлештерĕ. Кăмăл тăвакансем эстафетăра чупса, пляж волейболĕ, мини футбол, шашка-шахматла, стрит-баскетла выляса, канат туртса, штанга çĕклесе ăмăртма пултарĕç. Хăш-пĕр тĕссем вырăнти хăй тытăмлăх органĕсен спартакиадин программипе иртеççĕ.
Çак кун çавăн пекех Вăрнарти «Химик-Август» футбол команди Чăваш ен Кубокĕшĕн Шупашкарти «ОМОН» командăпа финалта тĕл пулать. Вăйă Шупашкарти «Олимпийский» стадионта иртет. Кăмăл тăвакансем унта çитсе хамăр футболистсемшĕн «чирлеме» пултараççĕ. Шупашкара кайса килме «Химик» спорт клубĕ кăçал та автобуссем уйăрать, вĕсем шăмат кун физкультурăпа спорт комплексĕ умĕнчен 12 сехетре тапранса каяççĕ. Финал 14 сехетре пуçланать.
С.ЧИКМЯКОВА