29 июля 2013 г.
Çавалкасри Галина Анатольевнăпа Владимир Петрович Анисимовсем çемье çавăрса пурăнма тытăннăранпа 35 çул çитрĕ. Вĕсем 5 ача пăхса çитĕнтернĕ, ура çине тăратнă. Сергей, Алина тата Вова университет тата институт пĕтерсе аслă пĕлÿллĕ специалистсем пулса тăчĕç, хамăр республикăрах тĕрлĕ çĕрте ĕçлеççĕ.
Вĕсем ĕнтĕ хăйсем çемье çавăрнă, кинĕсемпе кĕрÿшĕсем та аслă пĕлÿллĕ специалистсем. Анисимовсен аслă хĕрĕ Надя Мăн Явăша качча тухрĕ, унăн мăшăрĕ Толя Толстов Çавалкас тăрăхĕнче выльăх тухтăрĕнче вăй хурать. Анисимовсен халĕ 5 мăнук.
Анисимовсен çемйи чи малтан ĕçченлĕхпе, тăрăшулăхпа палăрса тăрать. Çемье пуçĕ Владимир Петрович Карл Маркс ячĕллĕ ял хуçалăх кооперативĕнче тимлет, малтанах вăл 5 çул тракторпа ĕçленĕ, халĕ 35 çула яхăн пăрусем пăхать.
Галина Волонтер ялĕнче 1957 çулта нумай ачаллă хресчен çемйинче çуралнă. Ялти шкула пĕтерсен комсомол путевкипе ял хуçалăхĕнче ĕçлеме юлать, малтанах 5 çул фермăра дояркăра ĕçлет. Кайран Çавалкас тăрăхне качча килсен фермăра пăрусем пăхма пуçлать. Вĕсем мăшăрĕпе пĕрле çамрăк выльăхсене 30 çул ытла пăхаççĕ. Галинăн пĕтĕмĕшле ĕç стажĕ 40 çул енне.
Ферма ĕçченне 1975 çулта «9-мĕш пилĕкçуллăхăн çамрăк гвардеецĕ» паллăпа наградăланă. Тăрăшуллă пулнăшăн турист путевкипе çĕршыв тăрăх, герой-хуласем тăрăх курса çÿреме янă. Галинăна уйрăмах Киев, Одесса, Севастополь, Керчь, Волгоград хулисем килĕшнĕ.
Галина Анатольевнăна тăрăшса ĕçленĕшĕн кашни çулах Акатуйĕнче чыслаççĕ. Пĕлтĕр вара Чăваш Республикин ял хуçалăх министрĕ Сергей Павлов ăна нумай çул хушши ял хуçалăхĕнче тăрăшса ĕçленĕшĕн Хисеп грамотипе чысланă. Карл Маркс ячĕллĕ ял хуçалăх кооператив ертÿçи Валерий Филиппович Шумилов та Галина Анатольевнăн ĕçĕпе кăмăллă.
Анисимовсем килĕнче картиш тулли выльăх-чĕрлĕх, хур-кăвакал усраççĕ. Кÿршĕсемпе, ял-йышпа, тăванĕсемпе хутшăнаççĕ, вĕсем пур çынпа та тарават.
Ĕçчен çемье 1998 çулта кирпĕчрен пÿрт çавăрса лартрĕ, ытти хуралтисем те (мунчи, кĕлечĕ, дачи) пĕтĕмпех çĕнĕ.
Анисимовсем мал ĕмĕтлĕ, пурнăçри йывăрлăхсем умĕнче пуçа усмаççĕ. Вĕсем пек çынсем пулсан ял пĕтмест.
П.ЗОЛОВ