29 июля 2013 г.
Утă уйăхĕн 20-мĕшĕнче ир-ирех Пăваялĕнчи футбол вылякан вырăна çамрăксем пухăнса тасатма пикенчĕç. Культура ĕçченĕсем, Надя Курсовăпа Линда Дмитриева, тата Вăрнарта çĕнĕрен уçăлнă кафере тимлекен Света Никонорова шÿрпе, шашлăк, хашлама пĕçерме хыпăнчĕç. Медицина ĕçченĕ Эльвира Николаевна та кунтах. Çак кун кăнтăрла иртни 2 сехетре 9 ялтан командăсем футбол выляма килмелле-çке. Ăмăртусене йĕркелекенĕ Пăваяль хастарĕ, хăй тĕллĕн аталанса вăй илнĕ предприниматель Николай Сергеевич Кириллов. Хăй ирĕкĕпе вăл çулсерен, çуллахи каникул вăхăтĕнче, футбол команди йĕркелесе ачасене кашни шăмат кун выляма илсе çÿрет. Çавăнпа ачасен урам тăрăх «йытă хăваласа» çÿреме вăхăт та çук. Кăмăл енчен те, кĕлетке-çурăм тĕлĕшĕнчен те, сывлăх енчен те арçын ачасем патвар та маттур ÿсеççĕ. Ытларах пулинччĕ çакăн пек ырă шухăшлă хастарсем.
Унччен маларах иртнĕ ăмăртусенче мĕн каç пуличченех «Гол! Урра!» – тени кăна янăраса тăчĕ. Курма килнисем харпăр хăй ялĕн командишĕн пĕтĕм вăйран «чирлерĕç». Пăваяльсен команди пĕрремĕш тапхăр уçăлнă шăмат кун Кĕçĕн Кипекре кубок çĕнсе илме пултарнă пулсан, шел, ку хутĕнче çĕрпелсене выляса ячĕ. Нимех те мар, тепĕр чухне ăнăçу пирĕн енче пулĕ. Хăнасене вĕри шÿрпепе, техĕмлĕ хашламапа, шашлăкпа сăйларĕç. Каçхине вара культура çуртĕнче хаваслă дискотека ирттерчĕç. Тепĕр шăмат кун Санарпуçĕнче тĕл пулма калаçса татăлчĕç.
А.ПЕСКОВА