22 июля 2013 г.
Малти Ишек ял тăрăхĕнче ял кунĕсене çулсерен ирттересси ырă йăлана кĕнĕ. Çăлкас Кăкшăмра пурăнакансемпе хăнасем уява савăнăçлăн паллă тума кăçал та ялти культура çурчĕ умне йышлăн пухăннă.
Ял çыннисене саламласа, ырлăх-сывлăх сунса праçнике Малти Ишек ял поселенийĕн пуçлăхĕ Виталий Семенов уçнă.
Район администрацийĕн пуçлăхĕ Леонид Николаев та уява хутшăнса ялти ятлă-сумлă çынсене, ĕçре палăрнисене тĕрлĕ наградăпа чысланă. 51 çул ытла пĕрле килĕштерсе пурăнакан Ластухинсен мăшăрĕ «Юратупа шанчăклăхшăн» медале, Çăлкас Кăкшăмри модельлĕ библиотекăра 15 çул ытла тимлекен Эльвира Краснова Чăваш Республикин Культура министерствин Хисеп грамотине тивĕçнĕ.
Ял поселенийĕн пуçлăхĕ В.Семенов депутатсен районти Пухăвĕн депутачĕн Владимир Тимофеевăн (хăй уявра пулайман) ял çыннисене саламласа çырнă сăмахĕсене вуласа панă. «Пирĕн халĕ тăван ял ырлăхĕшĕн ĕçлеме вăхăт çитрĕ», – тенĕ унта уйрăммăн палăртса. Вăл пуçарнипе ялта çĕклекен çĕнĕ социаллă объектăн строительствинче пĕрремĕш кирпĕче район администрацийĕн пуçлăхĕ Леонид Николаев хунă. Ку икĕ хутлă çуртра стоматологи кабинечĕ, аптека тата лавкка ĕçлеме пуçлĕ.
Уявра вырăнти культура ĕçченĕсем тата Вăрнарти культурăпа кану центрĕн эстрада коллективĕ пурне те концертпа савăнтарнă.
Ачасем аттракционсем çинче вăхăта хаваслă ирттернĕ, çамрăксем спорт ăмăртăвĕсенче вăй виçнĕ. Кашниех вĕри шÿрпепе тата шашлăкпа сăйланма пултарнă.
И.ЯКОВЛЕВА