17 июля 2013 г.
Миçе çул ĕнтĕ Калинино райповĕ салара пурăнакансене тата хăнасене хăйсен професси кунĕнче чăн-чăн пысăк уявпа савăнтарать. Анчах кăçалхи, республикăри потребительсен кооперацийĕ йĕркеленнĕренпе 120 çул çитнине халаллани, нихçанхинчен чаплăрах та хаваслăрах иртсе кайрĕ.
Пĕчĕккисем валли – флешмоб-дискотека, аттракционсем, пылак вата, тÿлевсĕр мороженăй... Спорт вăййисене юратакансем ăмăртусен «секторĕнчен» тухма пĕлмерĕç, чăваш эстрада çăлтăрĕсен илемлĕ юррисемпе ташшисем пурне те сцена çывăхĕнчен нумайлăха уйрăлма памарĕç. Кунсăр пуçне – лотерея вылявĕ, ĕç хастарĕсен чыславĕ, фейерверк, райпо ĕçченĕсен ылтăн аллисемпе хатĕрленĕ шашлăк-шÿрпе – хăвна мĕн килĕшет çавна суйла, никам та кăмăлсăр юлмарĕ.
Тĕрĕссипе, Венера Николаева председатель пултаруллă та çирĕп ертсе пыракан райпо коллективĕн професси уявне çÿллĕ шайра кĕтсе илме сăлтавĕ те пур. Калинино райповĕ паянхи куна 13–14 пин çынна (çав шутра – чи катари ялсенче те) пуян ассортиментлă таварпа тивĕçтерет, хуларинчен кая мар капăр та хăтлă столовăй-кафесенче апатланма тата юбилей-туйсем уявлама сĕнет.
Çавăн пекех кондитер, пулă тăварлакан, пылак шĕвексен цехĕсем, аш-какай продукчĕсен производстви...Калининăсем пĕçерекен кăпăшка çăкăра мĕнле юратать тата халăх!
«Юлашки пилĕк çулта эпир ваккăн сутакан тавар çаврăнăшне 170 процент ÿстерме вăй-хал çитертĕмĕр. Лавккасемпе апатлану предприятийĕсене тимлесех юсарăмăр, чи çĕнĕ йышши технологи тата сивĕтмелли оборудовани туянса вырнаçтартăмăр. Çывăх вăхăтрах «Стройхозтовары» çĕнĕ лавкка уçасшăн. Тавар сутнисĕр пуçне стройматериалсене ял çыннисене киле çитиех пырса парасси таранчченех ĕçлеме тытăнатпăр», – паллаштарчĕ çитĕнÿсемпе тата малашлăх плансемпе Венера Николаева председатель, уява уçнă май.
Райпо кунĕн хăни – Чăвашпотребсоюз правленийĕн председателĕ Людмила Абрамова – калининăсене республикăри потребительсен кооперацийĕн тытăмĕнче малтисен ретĕнче çирĕп вырнаçнăшăн мухтарĕ. Район администрацийĕн пуçлăхĕ Леонид Николаев та Калинино райповĕн коллективĕ ял çыннисен ырлăхĕшĕн пысăк яваплăхпа ĕçленине, çулсерен ÿсекен кăтартусемпе район экономикин аталанăвне сумлă тÿпе хывнине палăртрĕ.
Мĕн пур ветерансен ячĕпе ĕçтешĕсене саламлакан Николай Юркинăн, хăй вăхăтĕнче райпо правленийĕн председателĕ пулнăскерĕн, сăмахĕсем уйрăмах витĕмлĕ те хĕрÿллĕ пулчĕç. Кооператорсен маларахри ăрăвĕсем çĕкленĕ лавккасемпе апатлану заведенийĕсене, цехсене юхăнма памасăр унчченхинчен те вăйлăрах ĕçлеттерме сунчĕ вăл.
Райпо ĕçченĕсене уяв сцени çинче саламланисем йышĕнче çавăн пекех – Калинино ял поселенийĕн пуçлăхĕ Л.Иванова, Раççей ял хуçалăх банкĕн районти уйрăмĕн ертÿçи Г.Аливанова, партнерлă предприяти-организацисен ертÿçисем, вырăнти шкулта вĕренекенсем, райпо лавккисем вырнаçнă поселенисен пуçлăхĕсем. Шăпах юлашкисем праçнике пĕчченшерĕн мар, хăйсен тăрăхĕнчи маттур спортсменсемпе пĕрле килнĕ. Вĕсем райпон ятарлă «Чăваш потребительсен кооперацийĕ – 120 çулта» кубокне çĕнсе илессишĕн старта тухрĕç.
Ăмăртура мала тухнă Калинино ял поселенийĕн командине В.Николаева председатель укçан парнесемпе те хавхалантарчĕ.
Лотерейăна хутшăннисенчен чи телейлисем тата анăçуллисем тÿлевсĕр 300, 500, 1000 тенкĕлĕх тавар туянма сертификатсем, сувенирсем выляса илчĕç. Праçнике илемлетме райпо калининăсем кăмăллакан чи юратнă артистсене – Данила Ленские, Татьянăна тата Алексей Шадрикова – чĕннĕ. Уяв сцени çинчен юрă-кĕвĕ, вăйă-кулă мĕн çĕрлеччен татăлмарĕ. Каçхи пĕлĕте капăрлатнă хÿхĕм фейерверк вара татах та ытларах çĕкленÿллĕ кăмăл-туйăм парнелерĕ.
Чи чăтăмлисем ир еннелле сулăничченех ташă каçĕнче савăнчĕç.
И.ЯКОВЛЕВА
фото: http://gov.cap.ru/photo.aspx?gov_id=589&id=12947