03 июля 2013 г.
Шăмат кун çĕршыв Пĕтĕм Раççейри XXIV Олимп кунне паллă турĕ. Ăна Сочире пулакан XXII Хĕллехи спорт вăййисене халалларĕç
Районта ку çуллахи тĕп спорт уявĕ «Химик» стадионта иртрĕ. Профессионал-спортсменсене, сывă пурнăç йĕркин тусĕсене çунтаракан шăрăх çанталăк та хăратмарĕ – вĕсем вăйăсенче кăмăлтан тупăшни сисĕнчĕ.
Олимп кунĕ спортăн тăватă тĕсне пĕрлештерчĕ. Мини-футболта арçынсен пилĕк команди вăй виçрĕ. Вылякансем хушшинче ытларах – поселок çамрăкĕсем, Вăрнарти хутăш препаратсен заводĕнче тимлекенсем. Вĕсемех – районта иртекен кашни футбол турнирĕн хастар хутшăнуçисем.
Вăйăсем яланхиллех хĕрÿ иртрĕç. Олимп кунĕн çĕнтерÿçи ятне поселок çамрăкĕсем тивĕçрĕç.
Футболистсем каннă хушăра дартс пеме те ĕлкĕрчĕç. Александр Марков акă унта пуринчен нумай – 113 очко пуçтарма пултарчĕ. Дмитрий Паймулкинăн унран виçĕ, Владимир Прокопьевăн тăхăр очко сахалтарах.
Массăллă спорт вăййисен кунĕсенче стритбол та куракансене хытă тыткăнлать. Стадионти баскетбол площадкинче ахаль чухне те çамрăксене час-часах курма пулать. Шăмат кун тупăшакансен командисем шутлă кăна пулчĕç пулин те вăйăсен хĕрÿлĕхĕ пĕчĕк пулмарĕ. Чи маттуррисем – «Химик-Август» çамрăкĕсем. Иккĕмĕш вырăнта – Хапăсри шкул команди, виççĕмĕшĕнче – Хапăс çамрăкĕсем.
Шел, пляж волейболĕ ку хутĕнче вылякансен шучĕпе савăнтармарĕ. Çапах та Дмитрий Паймулкин тренер патĕнче ăсталăха туптакан хĕрсем хитре вăйă кăтартма пултарчĕç.
Ку çуллахи спорт календарĕ пуян. Волейболистсене те, футболистсене те тĕрлĕ турнирсем кĕтеççĕ. Олимп кунне уçнă май, кун çинчен район администрацийĕн социаллă аталану пайĕн пуçлăхĕн заместителĕ Сергей Политов каларĕ. Район администрацийĕн пуçлăхĕн заместителĕ Федор Тимофеев çак кун кашни Раççей çыннишĕн пĕлтерĕшлине, Сочире иртекен олимпиадăра хамăр спортсменсене хавхалантармаллине палăртрĕ.
XXII Хĕллехи спорт вăййисем пуçланиччен 218 кун юлчĕ. Олимп кунне хутшăнакансем çак кунхи кăна мар, ытти ăмăртусенчи çĕнтерĕве те Раççейĕн пултаруллă спортсменĕсене халалланине палăртрĕç.
С.ЧИКМЯКОВА