07 июня 2013 г.
40 çул каялла, 1973 çулхи мартăн 6-мĕшĕнче, Совет Союзĕнче çамрăк çул-йĕр
инспекторĕсен отрячĕсем çинчен Положени йышăннă. Отрядсене кĕрекен ачасемпе
çамрăксен тĕп задачисем хăйсен тантăшĕсене, пĕчĕкрех тусĕсене çул-йĕр
правилисене вĕрентесси пулнă.
Паян çамрăк çул-йĕр инспекторĕсен отрячĕсем Раççейĕн кашни регионĕнче пур,
çĕршывĕпе 300 пин ытла шкул ачине пĕрлештереççĕ. Ачасем патшалăх автоинспекцийĕ
ирттерекен акцисемпе мероприятисене хастар хутшăнаççĕ.
Çакнашкал мероприятисенчен пĕри – «Хăрушсăр урапа» конкурс. Йăлана кĕнĕ
тăрăх, хăйсен регионĕнче мала тухнă командăсем Пĕтĕм Раççейри финалта чи
пултаруллă отряд ятне çĕнсе илессишĕн тупăшаççĕ.
Хамăр республикăра акă юлашки çулсенче ăмăртура Аçăмçырми шкулĕн отрядне
çитекен çук. Кăçал та вĕсем ытти районсен ушкăнĕсенчен маттуртарах та ăстарах
пулса çĕнтерĕве алăран вĕçертмен.
Çамрăк çул-йĕр инспекторĕсен отрячĕсем йĕркеленнĕренпе 40 çул çитнине
халалланă «Хăрушсăр урапа» республика конкурсĕ кăçал «Шурă чулсем» ача-пăча
лагерĕн базинче иртнĕ. Унта 24 команда тĕл пулнă, пурте – районти-хулари
тапхăрсен çĕнтерÿçисем. Çавăн пекех слета Марий Эл, Мордва республикисенчи,
Ульяновск облаçĕнчи çамрăк инспекторĕсем кăмăлласах хутшăннă.
Тĕрĕссипе, слет çамрăк çул-йĕр инспекторĕсен çулталăкри ĕçĕн пĕтĕмлетĕвĕ
пулса тăнă. Ачасем çул-йĕр правилисене тата тухтăр çитиччен çынна пĕрремĕш
медицина пулăшăвĕ памалли мелсене тĕрĕс пĕлнине, велосипедпа фигурăсем туса
ярăнас ăсталăха, агитбригадăсен конкурсĕнче пултарулăх номерĕсене кăтартнă.
Паллах, слет ачасемшĕн тупăшу кăна мар. Виçĕ куна пынă ăмăртусем çамрăксене çĕнĕ
паллашусем, савăнăçлă кăмăл-туйăм парнеленĕ.
Çивĕч тупăшура иртнĕ конкурссенче Шупашкар тата Йĕпреç районĕсен командисем
те пысăк результатсемпе палăрнă, вĕсем – 3-мĕш тата 2-мĕш вырăнсенче. Çĕнтерÿ
пьедесталĕн чи çÿллĕ картлашки çине вара каллех Ăçăмçырми шкулĕнче вĕренекенсем
хăпарма тивĕçнĕ. Малалла вĕсем Пĕтĕм Раççейри «Хăрушсăр урапа» конкурсра
республика чысне хÿтĕлĕç.
И.ЯКОВЛЕВА