07 июня 2013 г.
Вăрнар тата Украинăри Черкассы облаçĕнчи Золотоноша районĕсенчи Чапаев ячĕпе
хисепленекен колхозсен коллективĕсем пĕр-пĕрне шыраса тупса туслă çыхăнусем
йĕркеленĕренпе 50 çул çитрĕ
Украинăри Богушков Слободинче малтан хапăссен ертÿçи Александр Трофимович
Горбунов чăмăртанă делегаци хăналаннă. 1963 çулхи ĕççи умĕн пирĕн пата Украинăри
Чапаевецсен председателĕ Владимир Ничипорович Шаповал хăйĕн сатурĕсенчен
пуçтарнă ушкăнĕпе кĕрлеттерсе килнĕ, чăваш ялĕсемпе, район центрĕпе, Шупашкарпа
паллашнă.
Хапăссем çак тĕле вăйлă хатĕрленнĕ, çулталăк тăршшĕнче 200 ĕне, 300 пăру, 200
сысна валли çĕнĕ витесем туса лартнă. Ăратлă ĕнесем тăратма тата икĕ вите
стенисене хăпартнă. Пропашнойсен тухăçне хаклама пĕлекен украинсем сахăр
кăшманне гектартан 300 – 400 центнер, çĕр улмие 200-шер центнер илекен хапăссене
мухтанă. «Горбунов – шанчăклă партнер!» – тенĕ Шаповал.
Пирвайхи делегацисен пуçлăхĕсем Ылтăн Енрен Украинăри Компартин Золотоноша
райкомĕн пĕрремĕш секретарĕ А.П.Тимошенко, Золотоноша райĕçтăвкомĕн председателĕ
Н.Л.Павленко, Вăрнар енчен райкомăн пĕрремĕш секретарĕ А.В. Емельянов,
райĕçтăвком председателĕ В.Д.Данилов пулнă. В.Н.Шаповала кĕçех райĕçтăвком
председательне куçарнăччĕ, унччен ăна, колхоз председателĕ чухне, Вăрнар районĕн
Хисеп кĕнекине кĕртнĕ. А.Емельяновăн çывăх тусĕ, Вăрнара хытă килĕштернĕ Леонид
Никифорович Ткачук, экономика наукисен кандидачĕ, парти райкомĕн пĕрремĕш
секретарĕ, партин Черкассы обкомĕн секретарĕнче ĕçлерĕ. Пирĕн райкомăн Пĕрремĕшĕ
А.Т.Купчиков Золотоноша райкомĕн Пĕрремĕшĕпе В.Н.Пилипенкăпа тăтăшах ĕçлĕ
çырусемпе ылмашăнатчĕç, пĕр-пĕринпе канашлама кăмăллатчĕç.
Украинăна кайса çÿрени, унти ятлă-сумлă çынсемпе çывăхланни, производствăра
мала ÿкнисен опычĕпе паллашни пире, уйрăмăнах руководительсене, хуçалăх
ĕçĕ-хĕлĕпе ăс-хакăл культурине ÿстерме хистенĕ. Тĕрлĕ отрасльти коллективсем
пĕр-пĕрин интересĕсене кура туслашнă. Илемлĕ пултарулăх ушкăнĕсем нацисен
культурине пуянлатнă. Çавăнпа çыхăнусене çухатманни паян кун та пысăк
пĕлтерĕшлĕ. Ахăртнех, унчченхинчен те кирлĕрех.
А.Емельянов «Маяк» колхоз председательне Н.Р.Золотаренкăна асилсе çырнинчен:
«Золотоноша тăрăхĕнче çĕр улми вăрлăхĕ хăвăрт кивелет. Николай Романович пирĕн
«Гатчинский» тата «Столовая» текен сортсене туянма кăмăл турĕ. Çав сортлисем
Украинăра гектартан 300-шер центнер тухса савăнтарнă. Золотоношăна каярахпа эпир
çуллен 500 тонна çĕр улми вăрлăхĕ тăратнă. Сахăр кăшманĕн плантацине им-çамлама
хими заводĕнчен гербицидсем яраттăмăр. Пире вĕсем люцернăпа «Мироновская-808»
сортлă кĕрхи тулă вăрлăхĕ панă. Тулă малтанхи çулах (1967) гектар пуçне 30-шар
центнер тухрĕ...». Çакнашкал тĕслĕхсем питĕ кирлĕ. Шел тулĕк, çур ĕмĕрти çурри
яхăн хушăра чикĕ леш енĕпе уйăрнă тăвансем пек пулса юлтăмăр. Телее, çаплах-ха
пĕр-пĕрне пăрахмарăмăр...
М.ВАСИЛЬЕВ