05 июня 2013 г.
Тавралăха сыхламалли пĕтĕм тĕнчери куна çулленех çĕртме уйăхĕн 5-мĕшĕнче
паллă тăваççĕ. Уява ирттерме 1972 çулта Стокгольмри конференцире çирĕплетнĕ. Çак
куна паллă туни тавралăха хÿтĕлессипе тăрăшасси кашни çыннăн таса тивĕçĕ
пулмаллине çирĕп кăтартать.
Çут çанталăка упрас, тăван ене хăтлăх кĕртес, симĕслентерес тĕлĕшпе районта
курăмлă ĕçсем тăваççĕ. Пĕлтерĕшлĕ мероприятие çамрăксем те, аслă ăрурисем те
хастар хутшăнаççĕ. Акă кăçал ачасем хăйсем вĕренекен Мăн Явăшри шкул
территорийĕнче хыр, туя, кедр калчисем 200 яхăн лартса хăварнă. Аслă ăрурисенчен
Кĕçĕн Кипек ял тăрăхĕнче пурăнакан Харитон Петров ырă тĕслĕх кăтартать. Тăхăр
теçеткене çывхаракан ватă çулсерен йывăçсем лартать, çырма-çатрана вăй илме
памасть.
Е.ПОРФИРЬЕВА