Публикации » Cывă пул, шкул!

29 мая 2013 г.

Шĕнер Ишекри шкул директорĕ Татьяна Владимировна Скворцова юлашки шăнкăрав
уявĕ уçăлни çинчен пĕлтерчĕ. Хăнана шкул ветеранĕсене те чĕннĕ. Уява
ашшĕ-амăшĕсем те йышлăн килнĕ. Директор 9-мĕш класри 14 вĕренекене патшалăх
экзаменĕсене тытма кĕртни çинчен хăйĕн хушăвĕпе паллаштарчĕ, каччăсемпе хĕрсене
ăнăçу сунчĕ. Район администрацийĕн представителĕ И.Смолина пушă алăпа килмен:
район шайĕнчи ăмăртусенче мала тухнисене Дипломсемпе тата Мухтав хучĕсемпе
чысларĕ. Чылая пычĕ уяв. Ашшĕ-амăшĕсен ячĕпе Светлана Нестерова саламларĕ,
ветерансене çирĕп сывлăх, вăрăм ĕмĕр сунчĕ. Шăхальтен килнĕ педагогика ветеранĕ
Иван Смирнов купăсне тытрĕ те янăраттарчĕ кăна чăваш юррисене. Вĕренекенсем те
пухăннисене хăйсен пултарулăхĕпе паллаштарчĕç – юрăсемпе, вăйăсемпе савăнтарчĕç.
Валентина Ефимова повар хăнасене техĕмлĕ апатпа хăналарĕ. Чăннипех маттур Шĕнер
Ишек шкулĕнче ĕçлекенсем. Ăнăçу сунатăп сире пĕтĕм кăмăлтан.

Иван ЕГОРОВ