13 февраля 2010 г.
Çĕнĕ Шупашкарти «Грани» хаçат «Школа пресс – 2010» конкурс йĕркелени çинчен район хаçатĕнчен пĕлтĕмĕр. Унта Калининăри вăтам шкул та хутшăнчĕ. «Три кита» хаçат редакторĕ 11-мĕш «б» класра вĕренекен Надя Капитонова тата «Юный порыв» хаçат редакторĕ 11-мĕш «а» класра вĕренекен Катя Кошкина хаçатсен виçшер номерне электронлă почтăпа ярса пачĕç.
«Три кита» шкул пурнăçне, ачасен тата учительсен шухăшĕсене, шкулта иртекен уявсене пичетре çутатса тăрать. «Юный порыв» вара литература енĕпе ĕçлет. Кунта ачасем хăйсем çырнă сăвăсемпе калавсем кун çути кураççĕ.
Нарăс пуçламăшĕнче шкул хаçачĕсен редакторĕсене Çĕнĕ Шупашкарти Çамрăксен керменне чĕнчĕç. Тăваттăмĕш çул йĕркелекен конкурса кăçал вăтăр тăххăрăн хутшăннă. Надя Капитоновапа Катя Кошкина «Школа пресс – 2010» конкурсăн лауреат дипломĕсене илме тивĕçрĕç.