10 февраля 2010 г.
«Çĕнтерÿ çулĕнче» ачасене тĕрĕс воспитани парас тĕлĕшпе çырнă статьясем тăтăшах пичетленеççĕ. Çивĕч ыйту пирки манăн хамăн шухăш-кăмăла пĕлтерес килет. Эпĕ пилĕк хĕр ашшĕ. Мĕн пĕчĕкрен вĕсене ĕçе юратма, тÿрĕ кăмăллă, сăпайлă пулма вĕрентнĕрен пурте пурнăç çулĕ çине тĕрĕс тăчĕç. Ман шутпа, ача-пăча ашшĕ-амăшĕпе килте пĕрле тимлемесен, ырă ĕçсем тума васкамасан пĕлтерĕшлĕ программăсен тухăçлăхĕ чакĕ. Çамрăксем хушшинчи наркомансем, ĕçкĕçсем, пирус туртакансем – пурте вĕсем ĕçсĕр аптракансем. Ача выльăх-чĕрлĕх те пăхтăр, кил-терĕшре те тăрăштăр. Хальхи вăхăтра ачасене шкула автобуспа турттараççĕ. Вĕсем вара киле килсен ытларах чухне телевизор-компьютер патĕнчен уйрăлма пĕлмеççĕ. Вĕрентекен çулталăкĕнче учительсен те, ашшĕ-амăшĕсен те воспитани ĕçĕ çине ытларах тимлĕх уйăрасчĕ. Хамăн ачалăха аса илетĕп те, тăван хуçалăха та пулăшнă, пилĕк çухрăмри шкула та çуран çÿренĕ.