05 декабря 2009 г.
– Вунă çул ытла кĕтнĕ ĕмĕт пурнăçланчĕ, тинех эпир те хăтлă та ăшă хваттерте пурăнма пуçлăпăр, – йăлтăртатакан уçăсене алăра çавăрнă май савăнăçлăн пĕлтереççĕ Ирина Валерьевна Андреевапа Александр Эдуардович Еловский.
Çĕнĕ хваттере вĕсем «Кивĕ çурт-йĕр» программăпа килĕшÿллĕн тивĕçнĕ. Телейлисем вара – пĕтĕмпе вунвиçĕ çемье. Вĕсем К.Маркс урамĕнчи 28-мĕш, Тракторнăй тăкăрлăкри 1-мĕш тата 3-мĕш, А.Иванов урамĕнчи 9-мĕш тата Лесхознăй урамри 21-мĕш çĕрĕшнĕ тата кивелсе çитнĕ çуртсенчен куçакансем.
Хуçалăхсем хушшинчи «Вурнарская» строительство организацийĕ Комсомольски урамĕнче, çĕвĕ фабрикипе юнашар, çĕкленĕ çурт паянхи стандартсене туллин тивĕçтерет. «Кивĕ çурт-йĕр» программа йĕркипе тунă хваттерсене акă хăть паян тесен паян кĕрсе пурăн, вĕсенче электро-, газ тата сантехника оборудованисене пĕтĕмпех вырнаçтарнă.
Асăннă программăпа хваттер тивĕçнисене ĕнер савăнăçлă лару-тăрура чысларĕç, уçăсем пачĕç.