14 ноября 2009 г.
Росстат кăтартăвĕсем тăрăх, Чăваш енре кăçалхи октябрьте сахăр хакĕ – 9,2:, çавăн пекех çăнăх, çăкăр изделийĕсен, улма-çимĕç продукцийĕн, çĕр улми, макарон-кĕрпе, пулă-аш продукчĕсен, тăвар, специ, концентратсен хакĕсем 4,8–0,2: чакнă.
Çав вăхăтрах алкогольлĕ шĕвексем, чей, кофе, кондитер изделийĕсем, улма-çырла тата пахча çимĕç консервисем, сыр, мороженăй, çу, çăмарта, сĕт, сĕт продукцийĕ унчченхинчен 0,1 – 3,1: хаклăрах. Пуринчен ытла сĕтшĕн – 3,1: – ытларах тÿлеме тивнĕ.
Çынна пĕр уйăхра кирлĕ апат-çимĕç пуххин чи пĕчĕк виçи октябрьте 1751,23 тенкĕ тесе палăртнă. Вăл, сăмах май, 2,1: йÿнелнĕ.
Апат-çимĕç мар таварсем хушшинче сехетсен, табак изделийĕсен, пусма, сăран атă-пушмак, тум-тир, фарфор-фаянс савăт-сапа, канцеляри хатĕрĕсен тата ытти япаласен хакĕсем хăпарса кайнă пулсан, сĕтел-пуканпа телерадиотаварсем, спорт инвентарĕ, медицина таварĕсем, стройматериалсем, нефть продукчĕсем йÿнĕрех пулнă.
Тĕрлĕ тивĕçтерÿсене илес-тĕк, вĕсемшĕн вĕрентÿре, çыхăну тытăмĕнче, коммуналлă хуçалăхпа пурăнмалли çурт-йĕрте, спортра тата ытти сферăра укçа нумайрах кăларса пама тивнĕ.