16 сентября 2009 г.
Ĕнер районта Чăваш Республикин патшалăх пурăнмалли çурт-йĕр инспекторĕ В.Ильин пулнă. Вăл пурăнмалли çурт-йĕр комплексне тата социаллă сфера объекчĕсене хутса ăшăтмалли тапхăра епле хатĕрленипе тата тĕплĕ юсав ĕçĕсемпе паллашнă.
Владимир Ильичăн ĕçлĕ çÿревĕ район администрацийĕн строительство тата пурăнмалли çурт-йĕр пайĕнче пуçланнă.
– Пурăнмалли çурт-йĕр тата социаллă сфера объекчĕсене кĕркуннехи-хĕллехи тапхăра хатĕрлессине тĕрĕслесси Чăваш Республикин Министрсен Кабинечĕн йышăнăвĕпе пулса пырать. Районтан хĕле хатĕрленни пирки кашни эрнерех информаци килсе тăрать, анчах та пурăнмалли çурт-йĕр хатĕрлĕхĕ пирки хальлĕхе паспортсем çук-ха,– пĕлтернĕ патшалăх инспекторĕ.
В.Ильин çавăн пекех районта май уйăхĕн 15-мĕшĕнчен пуçласа сентябрĕн 15-мĕшĕччен те тĕплĕ юсавпа нумай хваттерлĕ пĕр çурта та комиссипе йышăнманнишĕн кăмăлсăрланнă. Хăй вăл юсав иртекен çуртсенче çу тăршшĕнче темиçе те пулнă, ĕçсемпе паллашсах тăнă. Тĕрĕслев вăхăтĕнче вăл хăш-пĕрисенче юсав ĕçĕсене маларах та вĕçлеме май пулнине палăртнă.
Владимир Ильич çавăн пекех пурăнмалли çурт-йĕр комплексĕн объекчĕсенче, котельнăйсенче пулса хутса ăшăтмалли тапхăра епле хатĕрленнипе кăсăкланнă, документсене тишкернĕ. Çак тĕрĕслев район прокуратурин представителĕ Павел Кокорев хутшăннипе иртнĕ.