05 сентября 2009 г.
Калининăри вăтам шкултан вĕренсе тухнă ачасем вырăнти культура çуртĕнче йĕркеленĕ рок-концерт чылай ялти халăха пуçтарнă. «Цезарь» ушкăнăн отчетлă концертне виççĕмĕш çул итлеççĕ ĕнтĕ вĕсем. Кăçал ăна Раççейри Çамрăксен çулталăкне халалланă.
Ку хутĕнче рок-музыкантсен уявĕнче хăнасем те хăйсен пултарулăхне кăтартнă: Красноармейски салинчи «Отражение снов» ушкăн, Калининăри Алексей Волков тата Шупашкарти Валерий Артемьев солистсем.
«Цезарь» кăçалхи репертуара паллă композицисене кăна мар, хăйсем çырнă юрăсене те кĕртнĕ. Ушкăна пултаруллă çамрăксем – Чăваш патшалăх университечĕн студенчĕсем Юрий Ананьевпа (вокал, гитара) Евгений Ефимов (çапса вылякан), Мускаври строительство университечĕн студенчĕ Федор Виноходов (бас-гитара), Чулхулари техника университечĕн студенчĕ Виталий Ананьев (вокал, гитара) – пĕрлешнĕ. Вĕрентекенсем, ял çыннисем вĕсемпе тивĕçлипех мухтанаççĕ, çитĕнекен ăрăва ырă тĕслĕх пама пултарнăшăн, тĕрлĕ хуласенче вĕренеççĕ пулин те çакнашкал концертсене тăван кĕтесре йĕркелеме пултарнăшăн савăнаççĕ, тав тăваççĕ.