08 июля 2009 г.
Иртнĕ канмалли кунсенче Шупашкарта тата Çĕнĕ Шупашкарта спортăн пилĕк тĕсĕпе яллă вырăнта пурăнакансем хушшинчи Пĕтĕм Раççейри ăмăртусен финалĕ пулнă.
Ял урлă выртакан çулпа чупассипе Чăваш енĕн пĕрлештернĕ команди йышне пирĕн районти ултă чупуçă та кĕнĕ. Кăмпалти Таня Макарова, Шĕнер Ишекри Мальвина Михайлова тата Калининăри Андрей Николаев республикăри ăста спортсменсемпе пĕр йышра чупнă команда иккĕмĕш вырăн йышăннă. Чăвашсене Свердловск облаçĕн чупуçисем иртсе кайнă, виççĕмĕш вырăнта – пушкăртстансем.
Команда кĕмĕл медаль çĕнсе илнинче Вăрнарти ял хуçалăх техникумĕн физвоспитани преподавателĕн Галина Павлован тата Сергей Политовпа Мефодий Павлов студентсен те тÿпи сумлă.