10 июня 2009 г.
Вăрнарти 2-мĕш вăтам шкул картишĕнче ача-пăча сасси хаваслăн янăрать. Кĕçĕн классенче вĕренекенсем – сывлăха çирĕплетекен лагере çÿрекенсем – пĕр-пĕринпе тупăшса турник çинче туртăнаççĕ, шăчă тăрăх хăпараççĕ, сикеççĕ, чупаççĕ.
Çур уйăха яхăн ĕçлекен лагерь йĕркине хăнăхнă ĕнтĕ вĕсем, пÿле-пÿле хăйсене килĕшнĕ мероприятисем çинчен каласа параççĕ. Конкурссемпе вăйăсем вара кашни кунах иртеççĕ, вĕсем пурте кĕçĕннисен тавракурăмне анлăлатас, ăс-тăнне пуянлатас, сывлăхне çирĕплетес тĕллевлĕ.
Вожатăйсем вĕсен канăвне усăллă ирттерессине пысăк тимлĕх уйăрнă, программăна кунсеренех кăсăклă мероприятисем кĕртме тăршаççĕ. Ĕнер акă ачасем чукун çул вокзалĕ çывăхĕнчи площадьре чăн-чăн Туслăх, Тăнăçлăх уйне «уçрĕç», тĕрлĕ тĕслĕ пурăсемпе асфальт çине хĕвеллĕ, лăпкă, çак пахалăхлă енсем хуçаланакан тĕнчене сăнларĕç.