25 апреля 2009 г.
Хальхи вăхăтра уйрăм предпринимательсем кашни ялта тенĕ пекех лавккасем уçма тăрăшаççĕ. Конкуренцие юрăхлă пулас тесен Калинино райповĕнче вăй хуракансен тата хастартарах ĕçлеме, пурнăç таппипе тан пыма тивет.
Акă правлени председателĕ Светлана Андреевна Емельянова тата суту-илÿ пайĕнче тимлекенсем тăрăшнипе райпон Вăрманкасри лавккине кĕске вăхăтра çĕнетсе улăштарчĕç. Ăна юнкун савăнăçлă лару-тăрура уçрĕç. «Финанс кризисĕ тесе эпир пуçа усса лармастпăр, малалла аталанассишĕн ырми-канми ĕçлетпĕр, – терĕ Калинино райпо Канашĕн председателĕ Лидия Федоровна Миговарова. – Вăрманкасри лавккана ял халăхĕ те, ытти тăрăхра пурăнакансем те хапăлласах çÿреччĕр».
Пухăннă çынсем пĕри те тепри лавкка тулаш енчен те, шалтан та илемленнине кăмăллăн палăртрĕç. Сентресем çинче тата мĕн тĕрлĕ кăна тавар çук пулĕ! Апат-çимĕç продукчĕсем, кил-тĕрĕшре кирлĕ япаласем, шкул хатĕрĕсем, çи-пуç... Хакĕсем çыртмаççĕ. «Халăхшăн тăрăшатпăр», – терĕ Калинино райповĕн заготовителĕ Ирина Григорьевна Баранова.
Черет тăракансен йышĕ кĕске вăхăтра ÿссе кайрĕ. Фаина Гладкова сутуçă вăр-вар ĕçлет, тавар илекенсене мĕн кирлипе хăвăрт тивĕçтерет.
Вăрманкас ял тăрăхĕн пуçлăхĕ Мария Никифоровна Кошкина лавккана уçнăшăн Лидия Миговарована тав сăмахĕ каларĕ, урамра асфальт çул сарассипе хытах тимлеме шантарчĕ.