08 апреля 2009 г.
Паян кирлĕ информацие тĕрлĕ çăлкуçран тупма май пур, анчах кĕнекене юратма вĕрентесси,
ытларах вулама интереслентересси уйрăмах пĕлтерĕшлĕ. Çак тĕллевпех мартăн 30-мĕшĕ – апрелĕн 3-мĕшĕнче Раççейри пĕтĕм ача-пăча библиотекисенче ача-пăча кĕнекин эрни иртнĕ.
Районти тĕп библиотекăн ача-пăча литературин уйрăмĕнче тимлекенсем те унта тĕрлĕ енлĕ те пуян программăпа хутшăннă.
Пĕрремĕш кунне «Кĕтнĕ хăнасем пуçтарăнчĕç кунта...» ятпа тус-юлташсен каçĕ иртнĕ. Пĕчĕк вулакансем викторина-конкурссенче вăрманти арçурипе Бармалей хушнă ĕçсене пурнăçласа Ашапатман карчăк патне хăнана çитнĕ, юмахри сăнарсемпе тĕл пулнă. Ытларикун вара вулав залĕнче «Литература геройĕсем патĕнче хăнара» черетлĕ мероприяти йĕркеленĕ. Библиотекарьсем ертсе пынипе ачасем «Юмах ятне пĕл» викторинăна тата «Эсир юмахсене лайăх пĕлетĕр-и;» вăййа хутшăннă. Чи юратнă сăнарсенчен пĕри – Буратино – ăмăрту тăршшĕпех ачасене хавхалантарса- пулăшса пынă, çĕнтерÿçĕсене унăн аллинчен парнесем илме те питĕ кăмăллă пулнă. Тĕрĕссипе каласан, юмаха ĕненни пĕчĕк шăпăрлансемшĕн те, аслисемшĕн те кирлĕ, мĕншĕн тесен вăл ыррине кăна вĕрентет.
Кайăксен кунне халалланă «Поле чудес» шоу-вăйăра чи телейли те ăнăçли Дарья Сагунова пулнă. Ăна çĕнтерÿпе саламласа «тĕнчери тĕлĕнтермĕшсене çитсе курма çул çÿрев путевкипе» чысланă.
Кĕçнерникун библиотека ĕçченĕсем ачасене «Модные штучки» илемлĕх салонне чĕннĕ, вĕсене мĕн авалтан пуçласа 19-мĕш ĕмĕрчченхи мода историйĕпе паллаштарнă. «Хăвăн çине пăх» викторинăна тата «Костюм шутласа кăлар» конкурса хутшăнакансем пылак парнесене тивĕçнĕ.
Ача-пăча эрнин юлашки кунĕнче библиотекарьсем «Çарăк» юмах геройĕсене пурнăçа кăларнă, куракансем умĕнче профессионаллă актерсенчен кая мар выляса кăтартнă. Çавăн пекех кĕçĕн шкул ÿсĕмĕнчи вĕренекенсем «Тавçăрса ил-ха» викторинăра тупăшнă.
Ача-пăча кĕнекин эрнине хастар хутшăннисене тата тарăн пĕлÿ кăтартнисене Хисеп грамотисемпе чысласа хавхалантарнă.