04 апреля 2009 г.
Туçи Çармăсри шкулта кĕçĕн классен эрни иртрĕ. Ачасем ăна тĕссене халалларĕç.
Тунтикун пур ача та шап-шурă тумпа килчĕ. Шурă тĕс тасалăха пĕлтерет, çавăнпа та çак куна халалласа Н.П.Соловьева кĕçĕннисемпе «Сывлăха упрар» темăпа калаçу ирттерчĕ.
Ытларикун симĕс кун пулчĕ. Вĕрентекенсем те ачасенчен юлмарĕç, симĕс тумпа килчĕç. Иккĕмĕш класс ертÿçи Е.М.Николаева çут çанталăк темипе «Çăлтăр саманчĕ» вăйă ирттерчĕ. Вăйăра иккĕмĕш класра вĕренекен Тагир Карибов çĕнтерÿçĕ пулса тăчĕ.
Виççĕмĕш куна та ачасем чăтăмсăррăн кĕтрĕç. Хĕрлĕ тум тупайманнисем пит çăмартисене хĕретсе килме тавçăрчĕç. Кĕçĕн классен учителĕ О.В.Маркова йĕркеленипе икĕ командăна уйрăлса вăй виçрĕç. Тĕрлĕ вăйăсенче малти вырăна «Здоровячки» команда тухрĕ.
Кĕçнерникуна кăвак тĕсе халалларĕç. Çак кун ачасем юмах тĕнчине кĕрсе ÿкрĕç. Пулас артистсене виççĕмĕш классен ертÿçи О.А.Иванова хатĕрлерĕ.
Тепĕр кунне сарă тум тăхăннă ачасем Т.Г.Волкова аслă вожатăй пулăшнипе хăйсен пултарулăхĕпе паллаштарчĕç. Вĕсем куракансене çепĕç сассисемпе илĕртрĕç. Чи талантлисем – Ксюша Кузюкова, Вика Ефремова, Эдик Федоров, Павлик Волков, Анита Маркова, Снежанна Филиппова, Алеша Яковлев тата Андрей Козлов.
Вĕрентекенсем ачасене тĕрлĕ парнесемпе тата грамотăсемпе чысласа хавхалантарчĕç.