17 декабря 2008 г.
Районта шкул ачисен спартакиади йĕркипе пыракан волейбол турнирне иртнĕ эрнекун хĕрачасен вунпĕр команди хутшăнчĕ. Вăйăсем Вăрнарти физкультурăпа спорт комплексĕнче тата 1-мĕш вăтам шкулăн спорт залĕнче иртрĕç.
Иртнĕ çулсенчи вăйăсене шута хурса пулĕ турнира йĕркелекенсем малтанласах тавçăрни тÿрре тухрĕ – Çĕрпелти вăтам шкул хĕрĕсем пĕрремĕш вырăн йышăнчĕç. «Призлă вырăншăн хĕрÿ тупăшу пырать – вăйлă командăсем пур», – палăртрĕç вĕсем темиçе шкул ятне асăнса. Чи вăйлисене вара финал кăтартрĕ: Аçăмçырминчи вăтам шкул команди иккĕмĕш, Кульцаври вăтам шкул команди виççĕмĕш вырăнсене йышăнчĕç.
Январь–февраль уйăхĕсенче волейболистсен район чысне республикăра хÿтĕлеме тивет. Унччен вара çĕнтерÿçĕсем районăн пĕрлештернĕ командине йĕркелĕç.