17 декабря 2008 г.
Çак тĕслĕхпе çамрăксем хаçат-журналтан писнĕ текен шухăша сирес килет. Калининăра пурăнакан çамрăк мăшăрсен – Николаевсен – килĕнче акă район хаçачĕ яланах кĕтнĕ хăна вырăнĕнче. Салара тĕпленнĕренпе çулталăк çурă ытларах кăна-ха, анчах Йĕпреçре пурăннă вăхăтра та вырăнти хаçата юратса вуланă вĕсем.
Телейĕ те пур. Кил хуçи хĕрарăмĕ – Надежда – акă «Çĕнтерÿ çулĕн» тăваттăмĕш лотерейин тĕп призне – тĕрлĕ тĕслĕ кăтартакан телевизора – выляса илчĕ.
– Савăнăçлă хыпара почтальонка хаçат пама килсен пĕлтерчĕ. Нихăçан та нимĕн те выляман та, малтанах ĕненессĕм килмерĕ, – пĕлтерет çирĕм тăххăрти Надя.
Н.Николаева Вăрнарти ветеринари станцийĕн Калининăри участокри ветлечебницăра ветеринар-фельдшерта тимлет. Мăшăрĕпе пĕр ача çитĕнтереççĕ. «Чăвашла лайăхах вулаймастăп пулин те хаçатăн кашни номерĕпе паллашатăп. Ăнланманнине мăшăр ăнлантарать – вăл ăна килĕштерсех тĕплĕн вулать. Халĕ радио çук та, район хыпарĕсене «Çĕнтерÿ çулĕ» урлă кăна вуласа пĕлетпĕр. Мана уйрăмах ачасем çинчен çырнă материалсем, врач тата халăх медицини канашĕсем килĕшеççĕ», – хушса хурать вăл.
Çамрăксем тенĕрен, Н.Николаева тĕрĕс каларĕ, «Çĕнтерÿ çулĕнче» ку ÿсĕмри аудитори валли публикацисем чылай. Эппин, хаçатпа туслашмалли кăна юлать.