26 ноября 2008 г.
Пĕлĕве тĕрĕслес, вăл е ку предметпа чи пултаруллине палăртас тĕллевпе районти вĕрентÿ управленийĕ шкул ачисем хушшинче çулсеренех олимпиадăсем ирттерет. Иртнĕ шăматкунпа вырсарникун 8–11-мĕш классем хушшинче Вăрнарти 1-мĕш шкулта чăваш чĕлхипе, астрономипе, математикăпа, экологипе тата обществознанипе ăс-хакăл тупăшăвĕ пулчĕ.
Чи маттуррисен йышне çак вĕренекенсем кĕчĕç: чăваш чĕлхипе – Кульцаври Света Петрова (вĕрентекенĕ – Н.Н.Михайлова), Туçи Çармăсри Алина Зайцева (Н.И.Алексеева), Вăрнарти 2-мĕш шкулти Оля Данилова (В.Т.Дмитриева), Кÿстÿмĕрти Людмила Петрова (Р.А.Антипова), Вăрнарти 1-мĕш шкулти Елена Ластухина (Н.А.Яковлева), Санарпуçĕнчи Кристина Мутина (И.Г.Семенова).
Астрономие Вăрнарти 1-мĕш шкулти 10-мĕш класри Владимир Тимофеев (Ю.А.Феофанов) тата 2-мĕш шкулти 10-мĕш класри Иван Захаров (Т.А.Михайлова) пуринчен аванрах пĕлнине кăтартрĕç. Экологипе чи çивĕччисем – Вăрнарти 2-мĕш шкулти Виталий Федоровпа Тимур Спиридонов (Л.А.Борисова). Обществознанипе Санарпуçĕнчи Оля Иванована (Н.М.Смирнов), Вăрнарти 1-мĕш шкулти Алевтина Фоминана тата Андрей Петрова (Н.Н.Афанасьева) çитекен пулмарĕ.
Математика олимпиадин çĕнтерÿçисем çаксем: Вăрнарти 2-мĕш шкулти Николай Антонов (Т.А.Сапожникова), Кульцаври Мария Корнилова (Т.Я.Першуткина), Вăрнарти 1-мĕш шкулти Анастасия Ананьева тата Надя Тимофеева ( В.М.Гурьева).
Районти тапхăрта çĕнтернисем республикăри предмет олимпиадисене хутшăнĕç. Вĕсенчен ăнăçу кĕтетпĕр.