23 августа 2008 г.
Тирпейлĕх ыйтăвне тăтăш çĕклетпĕр пулин те, чылайăшĕн ăс-тăнне вăл ниепле те пырса тивмест курăнать. Утма çулсенче, ун хĕррисенче, çурт çывăхĕсенче кĕленчесемпе канфет хучĕсем, чипсы-мăйăр пакечĕсем, ытти ăпăр-тапăр çав-çавах йăванать-ха, унта та кунта санкцилемен çÿп-çап куписем йĕркеленеççĕ, асфальтлă çул айăккисем хыт-хурапа хупланаççĕ...
Кĕçнерникун район администрацийĕн ĕçченĕсемпе пĕрле ял поселенийĕсем тăрăх ирттернĕ «çул çÿрев» те хăш-пĕр çитменлĕхсене тупса палăртма май пачĕ. Пăртас ялĕнчи çуртсем умĕнчи çум-курăк поселени администрацийĕн территорийĕнче выртакан çÿп-çап миххисенчен, кăвайт юлашкийĕнчен самаях «çемçерех» курăнать. Автобус чарăнăвĕнче сăра кĕленчисем йăванаççĕ. Çынсем «хуçа курса çитереймест» тесе çапла нĕрсĕрле хăтланаççĕ-ши; Паллах, кунта çирĕп алă та кирлĕ.
Çав вăхăтрах шкул территорийĕнче ачасем хĕрсех ĕçлеççĕ, çÿп-çап тултарнă ланкашкаллă çула хăйăрпа хуплаççĕ.
Вăрманкасра, уйрăмах Калинино ял поселенийĕнче тирпей-илем кĕртессипе çине тăрса ĕçлени тÿрех сисĕнет. Хăмăш ялĕнче хыт-хура пачах курăнмасть, культура çурчĕ, шкул чечексем айне путнă.
Мăн Явăш ял поселенийĕнче кĕçех Çăкаллă Явăшран Чулкаçа каякан çĕнĕ çул уçăлĕ. Ун айăккипе ÿсекен вĕлтрен-хупаха çав кун тĕлне тĕппипех пĕтерсен аванччĕ...
Район администрацийĕн социаллă аталану пайĕн ертсе пыракан специалисчĕ Александр Ильич Ильин çитменлĕхсене пĕтерме ял поселенийĕсен пуçлăхĕсемпе яваплă çыннисене çирĕп асăрхаттарчĕ.