26 июля 2008 г.
Çул çинче тимлĕ пулмалли çинчен пĕрре мар çырнă эпир. Водительсене те, çуран çÿрекенсене те асăрхаттарнă. ГИБДД сотрудникĕсем çул-йĕр правилисене пăхăнма чĕнсе калани те ахаль сăмах мар. Анчах асăрханулăх çинчен инкек çывхарсан кăна аса илетпĕр çав. Кайран вара ... ÿкĕнмелле пулса тухать.
Тунтикун, июлĕн 21-мĕшĕнче, акă, «Калинино– Шупашкар автоçул çинче, Хăмăш ялĕ çывăхĕнче, каллех хăрушă инкек пулса иртнĕ. Шупашкарта пурăнакан 31-ри Н. (Улатăр хулинче çуралса ÿснĕскер) хăйĕн «Форд-Фокус» çăмăл машинипе пынă, тепĕр транспорт хатĕрне хăваласа иртме хăтланнă чух руле тытса чарайман, кюветалла чăмса йăванса кайнă. Хуллентерех пыратăн, инçерех каятăн, тени тĕрĕсех çав: водитель автомашинăна хытах хăваланă курăнать, çапла майпа инкеке лекнĕ. Суранĕсем пурнăçшăн ытла хăрушă пулнă çамрăкăн: йĕтес шăмми хуçăлнă, сула çурăлса кайнă.