26 июля 2008 г.
Çутă сăнсем, таса туйăмсем пуррипе кăна пурнăç малалла тăсăлать. Ку туйăм – юрату. Ăна чĕрере 50 çул упраса пурăнни вара – чăн-чăн паттăрла ĕç. Çак сăмахсене Мăн Турхан тăрăхĕнчи Любовь Павловнапа Вениамин Васильевич Васильевсенех каланă тейĕн.
Васильевсем 1958 çулта пĕрлешнĕ, виçĕ хĕрпе пĕр ывăл пăхса çитĕнтернĕ. Ачисем пурте тăван Чăваш енрех тĕпленнĕ, тĕрлĕ отрасльте вăй хураççĕ.
Вениамин Васильевич «Знамя» хуçалăхра механизаторта ĕçленĕ. Любовь Павловна ĕмĕрне тăван колхозра, ПМК-ра тата сысна комплексĕнче ĕçлесе ирттернĕ.
Çемье пуçĕ чирлени мăшăрсен чăн туйăмĕсене тĕрĕсленĕ. Вениамин Васильевич 30 çул ĕнтĕ 1-мĕш ушкăнри инвалид. Чире чăтма, пурăнма ăна мăшăрĕ, ачисем, мăнукĕсем, чи кирли – юрату пурри – вăй-хăват парса тăрать.
Çак кунсенче Васильевсене ылтăн туй ячĕпе Мăн Турхан ял поселенийĕн пуçлăхĕ Н.Викторов, райадминистрацин загс пайĕн пуçлăхĕ А.Степанова, социаллă хÿтлĕх пайĕн пуçлăхĕ И.Романов тата унăн заместителĕ И.Смолина саламларĕç.