16:05 22 декабря 2015 г.
Ирĕклĕ кĕрешÿ спорчĕ ачасене уйрăмах тыткăнлани ку енĕпе иртекен турнирсен массăллăхĕнчен аван курăнать. Вăрнар районĕнчен кĕрешÿçĕсем – спорт мастерĕсем, спорт мастерĕн кандидачĕсем чылай тухнă. Ку тĕсĕн шкулĕнче ăсталăха туптанисенчен хăшĕ-пĕри паян тренерта ăста ĕçлет.
Районта ирĕклĕ майпа кĕрешес юхăм йĕркеленнĕренпе унта вун-вун çамрăк явăçнă. Шел те, вĕсене пĕтĕçтерессине пуçараканĕ темиçе çул каялла пирĕнтен ĕмĕрлĕхех уйрăлса кайрĕ. Анчах та ун ячĕ сÿнмен. Владимир Егорова асăнса Вăрнарта çулсеренех турнир иртет. Юлашки çулсенче вăл районти кĕрешÿçĕсемшĕн çеç мар, республикăри, ун тулашĕнчи спортсменсемшĕн те ăсталăха тĕрĕслемелли ăмăрту пулса тăчĕ.
Шăматкун В.Егоров ячĕллĕ турнир каллех Чăваш енри чи-чи пултаруллă кĕрешÿçĕсене палăртма май пачĕ. Унта Канаш тата Канаш районĕн, Красноармейски, Шупашкар, Сĕнтĕрвăрри районĕсенчи, çавăн пекех Ульяновск облаçĕнчи тата Тутарстанри командăсем хутшăнчĕç. Владимир Николаевич Федоров, Вăрнар кĕрешÿçисен федерацийĕн председателĕ, ачасен чăннипех те спорт тĕсĕ патне пысăк кăсăклăх пулнине ырласа асăнчĕ. Хăй вăл малтанхи çулсенче кĕрешÿçĕсене ăмăртусенче сахал мар хавхалантарнă. Ун ырă ĕçне те манмаççĕ. Турнира официаллă уçнă май, район администрацийĕн пуçлăхĕн заместителĕ Андрей Матвеев ăна Кубокпа тата Тав çырăвĕпе чысларĕ. Кĕрешÿ юхăмне аталантарассине сумлă тÿпе хывнăшăнах Владимир Николаевич Раççей Федерацин Тавне те тивĕçрĕ. Çакнашкал ырă ĕçшĕнех ку турнирăн тĕп спонсорне Юрий Кудрявцева та Тав çырăвĕ пачĕç.
Ăмăрту йĕркелÿçисем, сумлă хăнасем – тренерсем, судьясем, спонсорсем – хĕрачасемпе арçын ачасене спортпа ĕмĕр туслă пулма, ăмăртусенче çивĕчлĕх кăтартма сунчĕç.
Ытти спортсменсемпе пĕрле кавир çине вăрнарсем те йышлăн тухрĕç: Вăрнарти 1-мĕшпе 2-мĕш, Санарпуçĕнчи, Çĕрпелти, Кÿстÿмĕрти шкулсенче вĕренекенсем. Техникăна аванрах пĕлекеннисем, çаврăнăçуллăраххисем турнир пьедесталĕ çине те хăпарма тивĕçрĕç.
Никита Львов, Дима Львов, Настя Максимова, Милена Федорова (Вăрнар), Наталья Тихонова (Çĕрпел) – чемпионсем.
Дима Прокопьев, Семен Семенов, Юлия Константинова (Вăрнар), Настя Фадеева тата Настя Краснова (Санарпуç) – кĕмĕл призерсем.
Алексей Краснов, Алексей Тимофеев, Илья Алексеев, Кирилл Лукин, Камиль Хисамутдинов, Данил Федоров, Денис Карпов, Елена Петрова, Валерия Павлова, (Вăрнар), Эвелина Яковлева, Тоня Максимова (Çĕрпел) виççĕмĕш вырăнсене йышăнчĕç.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии