16:04 22 декабря 2015 г.
«Август» Фирмăн «Вăрнарти хутăш препаратсен завочĕ» филиалĕнче цехсемпе подразделенисем хушшинче ирттернĕ волейбол турнирне пĕтĕмлетрĕç.
Çĕнтерÿçĕ иртнĕ эрнерех паллă пулнăччĕ – «Звездопад» команда (сăнÿкерчĕкре) малтанах ыттисене самай кая хăварнăччĕ. Финалта вара иккĕмĕшпе виççĕмĕш вырăншăн тÿрех виçĕ команда кĕрешрĕ.
181-мĕшпе 182-мĕш цехсен пĕрлештернĕ команди «Рубеж» хурал предприятийĕпе пушар хуралĕн пайĕн пĕрлештернĕ командипе тупăшрĕ. Пĕрремĕш вăйă малтанах хĕрÿлĕх çуратрĕ. Пĕрремĕшсен тÿрех очкосем пухсан вĕсене хăваласа çитме май çук пекчĕ, анчах та вĕсен шучĕ 16-а çитсен хурал команди вăй пухрĕ, очкосене танлаштарчĕ. Ку командăра волейболăн нумай çулхи чăн-чăн тусĕсем пур: Олег Ефремов тата Владимир Максимов. Денис Ильин çамрăк командăна чылай очко кÿчĕ.
181-мĕшпе 182-мĕш цехсен волейболисчĕсем те çивĕч пулчĕç. Сергей Александровпа Сергей Филиппов акă çав тери ăста выляççĕ. Шел те, команда 0:2 шутпа выляса ярса призерсен йышне лекеймерĕ. Çакă ЛПХ цехне виççĕмĕш вырăна тухма май пачĕ.
Çĕнтерÿçĕ командăна тата призерсене социаллă тивĕçтерÿсен управленийĕн пуçлăхĕ Евгений Захаров тата «Звездопад» филиалĕн директорĕ Владимир Яковлев Кубокпа, грамотăсемпе, парнесемпе чысларĕç. Уйрăм Кубока волейбол ветеранĕ Анатолий Николаев тивĕçрĕ.
Завод ăмăртăвне чĕнÿ Кубокĕпе вĕçлерĕç. Унта пулăшу подразделенийĕсен команди çĕнтерчĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии