11:14 16 декабря 2015 г.
Чăваш Республикин патшалăх ветеринари службин «Вăрнар районĕнчи выльăх-чĕрлĕх чирĕсемпе кĕрешекен станци» бюджет учрежденийĕн тытăмĕнче – пĕрер ветстанципе ветпункт, пилĕкшер ветлечебницăпа ветучасток. Вĕсенче 48 çын тăрăшать, çав шутран 18 ветврач, 13 ветфельдшер.
Ветеринарсем мăйракаллă шултра выльăх-чĕрлĕхĕн 11 тĕрлĕ, сыснан 12 тĕрлĕ чир-чĕрĕнчен профилактика прививкисем тăваççĕ. Сурăхсене, йытăсене, кроликсене, ытти чĕрчуна та аякра хăвармаççĕ, вакцинăлаççĕ. Специалистсем çулталăкне вăтамран 40 пине яхăн тĕпчевсем туса ирттереççĕ. Çавăн пекех учрежденире тăрăшакансем патшалăх ветеринари асăрхавĕ тĕрĕслекен груза турттарса кайнă чухне ветеринари докуменчĕсем çырса параççĕ, выльăхпа ÿсен-тăранран туса илекен апат-çимĕçе ветеринарипе санитари экспертизи витĕр кăлараççĕ. Чир кÿрекен микробсене, сиенлĕ хурт-кăпшанка пĕтерессипе те , ытти ĕçе пурнăçлассипе те выльăх тухтăрĕсен тимлемелле.
Кăçал выльăх-чирлĕх чирĕсемпе кĕрешекен станци пуçлăхĕн пуканне Владимир Матвеева шанса панă. Вăл 1992 çулта Хусанти Н.Э. Бауман ячĕллĕ патшалăх ветеринари институтĕнчен вĕренсе тухнă. 23 çул хушшинче тĕрлĕ организацисенче вăй хунă: «Правда» хуçалăхăн ветеринари тухтăрĕнче, Вăрнарти типĕтнĕ сĕт завочĕ çумĕнчи патшалăх ветеринари асăрхавĕн уйрăмĕн пуçлăхĕнче, Калининăри ветлечебницăн заведующийĕнче, районти ветстанци пуçлăхĕн заместителĕнче, Раççей ял хуçалăх асăрхавĕн республикăри управленийĕн аслă инспекторĕнче тăрăшнă. Тÿрĕ кăмăлпа ĕçленĕшĕн тĕрлĕ шайри наградăна тивĕçнĕ.
Çĕрпелти ветеринари участокĕн заведующийĕ Сергей Игнатьев пысăк опытлă специалистсенчен пĕри. Яваплă ĕçре 18 çул тăрăшать. Кăçал вăл ветеринари ведомствин Тавне тивĕçнĕ.
Кăмашри ветеринари участокĕн заведующийĕпе Елизавета Григорьевăпа Людмила Толмасова ветфельдшер пирки те ырă сăмахсем каламалла. Вĕсем 12 ялта – Кăмашра, Чăрăшкас Мăратра, Етруккасси Мăратра, Мулакасси Мăратра, Пăваялĕнче, Кĕçĕн Кипекре, Çĕнĕ Кипекре, Иртеменкассинче, Элмен Сунарта, Мăн Турханта, Кушикре, Тĕмпекре – пурăнакансен, Людмила Дмитриевăпа Игорь Сергеев фермерсен хуçалăхĕсенчи, «Знамя» кооперативри выльăх-чĕрлĕх сывлăхне тĕрĕслесе тăраççĕ.
Ветучастокра транспорт çук. Специалистсем хастар. Çухрăмсене çуран утса та, велосипедпа çÿресе те парăнтарма пултараççĕ. Елизавета Григорьевăпа Людмила Толмасован аякри яла ир-ирех мĕнле çитмелле-ха;
– Кăткăс лару-тăруран тухма мăшăрсем – Василий Григорьевпа Николай Толмасов – пулăшаççĕ, машинăпа кирлĕ вырăна хăвăртах леçсе яраççĕ,– терĕ Елизавета Егоровна.– Мăшăрсем ерçмесен манăн шăллăм Иван Ермолаев пулăшу аллине тăсма хирĕç мар.
Хăш-пĕрисем, çирĕп хуçалăх тытакансемех, хăйсен выльăх-чĕрлĕхне прививкăсем тутарма васкамаççĕ. Укçа-тенкĕ перекетлетпĕр теççĕ-ши;! Чир-чĕр ересрен профилактика мероприятийĕсем туса ирттерни пысăк пĕлтерĕшлĕ. Кăçал акă çуркунне Липецк облаçĕнчи Елец хулинче пурăннă 15 çулти хĕре тухтăрсем те çăлса хăварайман. Çамрăка уртаракан чирпе чирленĕ йытă çури çыртнă пулнă. Шел те, паянхи кун çак чиртен сыватакан эмел çук. Выльăх-чĕрлĕхе вакцинăлани этеме те чиртен хÿтĕлĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии