11:09 16 декабря 2015 г.
Пысăк уяв пекех иртрĕ Элĕкри культурăпа кану центрĕн сцени çинче республикăри театрсен тата драма коллективĕсен «Мухтав ахрăмĕ» пĕтĕмлетÿ фестивалĕ. Хăй тĕллĕн вĕреннĕ артистсем тĕрлĕ районтан килсе çитнĕ. Çавăнпа-ши зал кураканпа тулли пулчĕ.
Фестивале савăнăçлă лару-тăрура уçрĕç. СССР халăх артистки Вера Кузьмина, Чăваш АССР халăх артистки Анна Кутузова, Чăваш Республикин культурăн тава тивĕçлĕ ĕçченĕ Владимир Григорьев тата Элĕк район администрацийĕн культура секторĕн ертÿçи Людмила Семенова пухăннисене ăшă сăмахсем каларĕç. Унтан элĕксем сцена çине «Ют çын» спектакльпе тухрĕç. Драмăна пăхнă хыççăн хумхануллă самант çитрĕ. Фестивальте кам мĕнле вырăн йышăннине пĕлме май пуртан пурте залра вырăнтан хускалмасăр, çăвара шыв сыпнă пек ларчĕç. Кĕçех сцена çине сумлă жюри тухрĕ. «Мухтав ахрăмĕ» фестиваль программине ертсе пыракан тĕрлĕ номинацире палăрнă коллективсемпе уйрăм çынсем ячĕсене асăнма пуçларĕ. Сцена çине пĕрин хыççăн теприне чĕнчĕç. Ыттисем пекех вăрнарсем те чылай диплом илчĕç. Акă Вăрнарти культура çуртĕнчи халăх театрĕн режиссерĕ Галина Иванова Н.Угарин пьеси тăрăх лартнă «Çăлтăрсем вăййа тухсан» спектакльшĕн «Чи лайăх режиссер ĕçĕ» номинацире иккĕмĕш степеньлĕ диплома тивĕçрĕ. Чăрăшкас Хирлепри халăх театрĕнче вылякан Георгий Семенов «Арçын рольне ăста калăплакан» номинацире палăрчĕ. Ăна пĕрремĕш степеньлĕ дипломпа чысларĕç. Хăмăшри Галина Блинова Нарспи рольне халăха килĕшмелле калăпланă. Унăн пултарулăхне жюрире ларакансем те асăрханă. Вăл та пĕрремĕш степеньлĕ диплома илме тивĕç пулчĕ. Чăрăшкас Хирлепри «Асамат» халăх театрĕн коллективне «Кин кĕртесси çăмăл мар» спектакльшĕн иккĕмĕш степеньлĕ диплома пачĕç. Мăн Явăшри драма кружокне пултарулăхри ăнтăлушăн дипломпа хавхалантарчĕç. Аслисемпе танах ачасем те тивĕçрĕç чыс-хисепе. Вĕсем те дипломлă пулса тăчĕç. Пĕтĕмлетÿ вăхăтĕнче вăрнарсен вунпĕр хутчен сцена çине хăпарма тиврĕ.
Кăнтăрла иртни икĕ сехетре Вăрнарти халăх театрĕ Элĕк районĕнчи Юлăшра пурăнакансене «Çăлтăрсем вăййа тухсан» спектакльпе савăнтарчĕ.
Каçхи ултă сехетре республикăри районсенчи театр ушкăнĕсем Элĕкри культурăпа кану центрне тепĕр хут пухăнчĕç. Вĕсем курма пынисене спектакльсенчи сыпăксемпе паллаштарчĕç. Вăрнарсене те залра ларакансем ăшшăн йышăнчĕç. Мĕншĕн тесен кашниех хăйĕн рольне ăста калăпларĕ, пысăк туйăмпа вылярĕ. Ахальтен мар ĕнтĕ халăх спектакль сыпăкĕ вĕçленсен тăвăллăн алă çупрĕ. Çакă вăрнарсен пултарулăхĕ пысăк пулнине кăтартса пачĕ.
Юрий КОРНИЛОВ.
Ÿкерчĕкре: Чăрăшкас Хирлепри халăх театрĕн пĕр ушкăнĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии