09:54 14 декабря 2015 г.
Юлашки вăхăтра вăл е ку социаллă служба ĕçченĕсем, пенсин пухăнакан пайне страхламалла тесе алăкран шаккаса çÿрекенсем час-часах пулкалаççĕ. Анчах та чăнах çак çынсемех-и вĕсем? Мушенниксем мар-и? Кун пек чухне мĕн тумалла? Çакăн пирки полицин «Вурнарский» пайĕн участокри уполномоченнăйсен тата çула çитменнисемпе ĕçлекен уйрăмĕн пуçлăхне Александр Кудрявцева каласа пама ыйтрăмăр.
– Полици преступниксенчен шар куракансене яланах пулăшма хатĕр, анчах та йĕркене пăсакансемпе кĕрешмелли чи лайăх мел – çынсем хăйсен прависене пĕлни тата тимлĕхе çухатманни.
Мушенниксем укçа вăрламалли тĕрлĕ схемăсем шутласа тупаççĕ. Хăвăр пурлăха, укçăра сыхласа хăварас тесен çак сĕнÿсене шута хурăр: ăнсăртран эсир пĕр-пĕр вылявра çĕнтерни çинчен СМС-хыпар килчĕ. Манса ан кайăр! Чăн-чăн приз тухнă пулсан, уншăн сирĕн нихăçан та укçа тÿлемелле мар. Укçана куçарма ан васкăр.
Е тата сирĕн пата палламан номертен шăнкăравласа тăванăр инкеке лекнине пĕлтереççĕ, ыйтăва татса пама пысăк сумма укçа кирлĕ иккен. Ку схемăпа мушенниксем çеç ĕçлеççĕ! Тăванăрсем патне шăнкăравласа пĕлĕр.
Сирĕн пата социаллă службăсен ĕçченĕсем тесе çынсем килнĕ. Алăка уçиччен, ку организацие шăнкăравласа пăхăр. Мушенниксем кун пек чухне вĕчĕрхенсе кайĕç. Укçана, хаклăхсене, документсене нихăçан та ют çынна ан тыттарăр.
Е тата палламан çынсем эмел, апат хутăшĕсем (БАД) е ытти япала туянма сĕнеççĕ. Пĕлĕр! Чăн-чăн эмелсене тата БАД-сене йăтса çÿресе сутмаççĕ. Вĕсене ятарлă аптекăра кăна туянма пулать.
Енчен те эсир е сирĕн çывăх çыннăрсем мушенниксен аллине çакланнине, е вĕсен тĕлĕшпе сĕмсĕрле ĕç тума хăтланакансем пуррине сиссен тăхтаса тăмасăр полицие 02 е 2-50-02 номерсемпе шăнкăравласа пĕлтерĕр.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии