16:29 11 декабря 2015 г.
П.Т.Тимофеев – ĕмĕрлĕх кĕнекене, Вăрнар районĕн энциклопедине, кĕме тивĕçнĕ сумлă çынсенчен пĕри. Мăн Явăшра çуралса ÿснĕ, вĕренÿре ку ялти тата Кĕçĕн Кипекри шкулсен отличникĕ пулнă, спорт ăмăртăвĕсенче, районти кроссенче ялан çĕнтерÿçĕсен ретне тăнă, республикăри тупăшусене хутшăннă. Совет Çарĕн службинче 1969 çулта биатлон енĕпе СССР спорт мастерĕн нормине ăнăçлăн пурнăçланă. Ăна колхозра хастар ĕçленĕшĕн мухтанине эпĕ лайăх астăватăп.
Петр Тимофеевич СССР Шалти ,çсен Министерствин Ф.Э.Дзержинский ячĕпе хисепленекен Хĕрлĕ Ялавлă Аслă Çар училищине, унтан СССР Шалти ,çсен Министерствин Аслă шкулне вĕренсе пĕтерчĕ. Совет Çарĕн сатур офицерĕ, Тăван çĕршывăн шанчăклă хуралçи хăйĕн çăмăл мар специальноçĕпе хĕрĕх çул ытла Саратов облаçĕнчи хими полигонĕнче ĕçлерĕ. Наградисем нумай. Çав шутра запаса тухсан панисем те пур. Спорт медалĕсем шăкăрин. Вăл паян кунчченех Шиханы хулинчи «Раççейри йĕлтĕр йĕрĕпе» юхăмăн организаторĕ. Йĕлтĕрпе чупса хăй çулĕсенчи спортсменсем хушшинче çирĕм çул ытла малти вырăнсене йышăнать. Мăшăрĕпе, мăнукĕсемпе пĕрле пахчара тăрмашма юратать: çĕр тĕрлĕ чечек ÿстереççĕ, хĕл каçмалăх улма-çырла, пахча çимĕçĕ тăваççĕ.
Вăл ачаран музыкăна кăмăлланă. Пушă вăхăт тупăннă чух хут купăсне алăран яман. ,нтĕ нумай çул хушши хулари «Корунд» культура керменĕнче ветерансен «Аван-и, юрă!» хорĕнче, вырăс юррисен «Чанкăрма» ансамблĕнче юрлать. Чăваш халăх юррисене сăнарласа кăтартма чăвашла концертсем йĕркелет, Сарă Ту таврашĕн ялĕсене ентешсем патне тухса çÿрет. «Ăçта чăваш – унта Чăваш ен!» – çавнашкал хаваспа авăрланнă-мĕн пирĕн Петĕр.
Юбиляра саламлама Мăн Явăшри культура çуртне хăнасем Вăрнартан, Шупашкартан, Мускавран килсе çитрĕç. Ялти культура центрĕн ертÿçи Нина Васильевна Андреева пуçарнипе илемлĕх сценарине унпа пĕрле Зоя Геннадьевна Александрова, Светлана Григорьевна Дергачева, Эльвира Васильевна Петрова хатĕрленĕ, улăштармалли костюмсен, юрă-кĕвĕсен, ĕçкĕ-çикĕре астивмелли кучченеçсен чăрмавне пĕтĕмĕшпе çавсем тивĕçтернĕ.
– Тĕлĕнмелле чаплă кĕреке пухăнчĕ, – терĕ Вăрнар районĕн пуçлăхĕ Валерий Шумилов. – Пархатарлă хастар ĕçпе, пĕтĕм кун-çул тăршшĕпе тăван еншĕн, чăвашлăхшăн, Тăван çĕршывшăн тăрăшса ят-сум илнĕ тăванăмăрсене чыслатпăр. Нимелле пурнăç тăвакансене çапла яланах нимелле хисеплемелле пултăрччĕ!
Валерий Филиппович – мăн-явăшсен кÿрши, Карл Маркс ячĕпе хисепленекен ял хуçалăх предприятийĕн ертÿçи, Чăваш Республикин ял хуçалăхăн тава тивĕçлĕ ĕçченĕ. Чыслав уявне хăйпе пĕрле Çавалкасри илемлĕ пултарулăх ансамбльне лартса килнĕ. Артисчĕсем – профессионалсем тейĕн. Мăн Явăш хĕрĕ – кăçал Шупашкарти культура училищине вĕренсе пĕтернĕ Алина Федотова хытă тĕлĕнтерчĕ: урине хум çилхине перĕнтермесĕр вĕçекен чарланпа пĕрех ташлать. Ольга Ивановна, Петр Тимофеевичăн мăшăрĕ, хамăрăн туйри инкесемле тумланнăскер, украинла юрласан та, чăвашла кулкаласа илет: «Мана Мăн Явăш кинĕ тейĕр, Ульки аппа тейĕр...».
Уяв тĕпелне сăмахпа тухнисем, юбилярпа шкулта пĕр класра вĕреннисем тата чи çывăхрах тусĕсем, пăхатăн та, пурте – районăн вĕçĕмсĕр кĕнекине кĕнĕ çынсем. Çав шутра: «Байконур» космодром ветеранĕ Эрик Васильев полковник, пĕтĕмĕшле вĕрентĕвĕн Раççей Федерацийĕнчи Хисеплĕ ĕçченĕ Денис Елизаров, ЧР тава тивĕçлĕ учителĕ, Пĕтĕм Раççейри конкурссен лауреачĕ Вера Гурьева, педагогика ветеранĕсем – Людмила Лаврентьева, Иван Иванов, Людмила Тихонова, ЧР тава тивĕçлĕ учителĕ, РСФСР спорт ветеранĕ Аркадий Смирнов, ,çлĕх Хĕрлĕ Ялав орденĕн кавалерĕ Василий Амаков, ЧР промышленноçăн тава тивĕçлĕ ĕçченĕ Вениамин Сорокин...
Мăн Явăшри çак уяв сăлтавне-сулăмне кура тĕвĕленнĕ шухăша ыррăн йышăнас килет. Вăрнарăн ĕмĕрлĕх кĕнекине – район энциклопедине кĕнĕ çынсене нимелле чысласси ырă йăла пулса тăма пултарать. Энциклопеди геройĕсем Енĕшсен тăрăхĕнче, Уравăшра, Элменсенче, Калининăра, Мăньял Хапăсра, Çĕрпелте, Хурăнсур Çармăсра, Малти Ишекре, Кăкшăмсенче, Пăртасра, Вăрнарта йышлă. Вĕсене уйрăм паллă праçниксенче, çуралнă кунĕсем е юбилейĕсем пĕр тĕлелле килнĕ вăхăтсенче пуçтарма пулать. Республика Пуçлăхĕн пуçарăвĕпе çитес 2016 çула ,ç çынни çулталăкĕ тесе пĕлтерчĕç. Мăн Явăшри евĕрлĕ мероприяти пысăк пĕлтерĕш илсе анлă сарăлма пултарĕччĕ. Ăна халь хăшпĕрисем ирттерекен урам е ял уявĕсемпе пĕрлештерме юрать.
Михаил
ВАСИЛЬЕВ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии