09:09 09 декабря 2015 г.
«Çĕнтерÿ çулне» вулакансен йышĕ ÿссех пырать. Ахăртнех, этеме чун çăкăрĕ те кирлине аванах ăнланаççĕ вăрнарсем
– Интернета кĕме май пулсан та хаçатах алла тытас килет. Акă «Çĕнтерÿ çулĕ» çĕнĕ хыпар-хăнарпа паллаштарсах тăрать, çивĕч ыйтусене хускатать, – палăртрĕ хăйĕн шухăшне Ольга Львова. – Тата пурнăç тути-масине астивнĕ çынсем çинчен çырнă статьясене те вуламасăр иртейместĕн.
Теприсем ав влаç органĕсенче ĕçлесен те районăн вĕçĕмсĕр кĕнекине çырăнса илмеççĕ. Ольга Львова вара «Çĕнтерÿ çулĕпе» нумай çул тачă çыхăну тытать. Хаçат тусĕнче патриотла кăмăл-туйăм çăлкуç пекех тапса тăрать. Унăн шучĕпе «Çĕнтерÿ çулĕ» районта пурăнакан кашни çемьене килмелле. «Декабрĕн 13-мĕшĕччен хамăрăн район хаçатне йÿнĕрех хакпа çырăнма пулать. Укçа-тенкĕ перекетлес текенсен çак майпа усă курмаллах, «Çĕнтерÿ çулне» çырăнма васкамаллах», – терĕ Ольга Степановна.
Ольга Львова районти тĕп больницăра тăрăшать. Маларах Вăрнарти хутăш препаратсен заводĕнче, çĕвĕ фабрикинче тимленĕ. Унăн «Звездопад» организацире вăй хуракан мăшăрĕ Герман Владимирович та «Çĕнтерÿ çулне» юратса вулать. «Район хаçачĕ çывăх тăван-пĕтен пекех. Ырра вĕрентет, сĕнÿ-канаш парать»,– тет иккен вăл.
Львовсен хĕрĕсем те Маринăпа Ирина «Çĕнтерÿ çулне» вуласа çитĕннĕ. Халĕ вĕсем пурнăçăн анлă çулĕпе çирĕппĕн утаççĕ.
Калас пулать, Ольга Львован Çăкаллă Явăшра пурăнакан шăллĕ Николай Иванов та район хаçатне çырăнса илет.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии