16:50 04 декабря 2015 г.
Раççей Федерацийĕн Президенчĕ Владимир Путин Федераци Пухăвĕн ячĕпе çыракан çулленхи Çырăвĕпе районта пурăнакансенчен чылайăшĕ паллашнă. Вĕсенчен хăшпĕрисем пире Çырупа çыхăннă шухăшсене уçса пачĕç.
Валерий Прахеев,
ĕç ветеранĕ, Вăрнар
– Мана терроризм çинчен калани кăмăла кайрĕ. Паян мĕнпур тавлашăва айккине сирсе террористсене хирĕç пĕрлехи фронт йĕркелесси, вăл ПНО ялавĕ айĕнче пулассине пĕлтерни пĕлтерĕшлĕ тетĕп. Çĕршыв ертÿçи каланă тăрăх, цивилизациллĕ кашни патшалăхăн террористсене аркатас ĕçе хăйсен тÿпине хывмалла. Иккĕлле стандартсем пулмалла мар. Çавăн пекех коррупципе çыхăннă йĕркесем те килĕшрĕç. Паян чиновниксем, судьясем, право хуралĕн ĕçченĕсем, мĕнпур шайри депутатсен хăйсен тупăшĕсемпе тăкакĕсем, пурлăхĕ çинчен деклараци пама тивĕç тесе каланине, малашне вара патшалăх тата муниципалитет служащийĕсем хăйсен тăванĕсен, тусĕсен тата çывăх çыннисен фирмисемпе тума палăртакан контрактсем, подрядсем çинчен калакан информацие уçмаллине пĕлтернине ырлатăп.
Иван Афанасьев,
Упнер ял тăрăхĕн администрацийĕн пуçлăхĕ,
– Владимир Путин Çырура экономикăпа çыхăннă ыйтусене нумай хускатрĕ. Вăл иртнĕ çул экономикăра пысăк чăрмавсем сиксе тухнине пытармарĕ. Нефть, экспорта ăсатакан ытти тавар хакĕ чакса кайнă. Çавах та, йывăрлăхсем пур пулин те, ырă туртăмсем палăрма пуçланă. Промышленноç производстви, наци валютин курсĕ тĕлĕшпе тăнăçлăх йĕркеленнĕ, инфляци майĕпен чакать. Çакă пире савăнтарать. «Хамăра нимĕн те улăштармасан резервсене çисе яма пултаратпăр, экономикăра та ÿсĕм пулмĕ. Пирĕн хавшак пулма ирĕк çук. Паянхи меллĕ майсемпе усă курса юлмалла», – тесе калани вырăнлă сăмахсем. Строительствăна, автомобильсем, чукун çул машинисем тăвассине, çăмăл промышленноçа пулăшма правительствăна ятарлă программа хатĕрлеме сĕнчĕ.
Владимир Матвеев,
районти ветеринари станци пуçлăхĕ,
– Эпĕ бизнес çинчен каланине уйрăмах тимлĕ итлерĕм. Прокуратурăн следстви пахалăхне тĕрĕслесе тăмалли инструментсемпе анлăрах усă курмалла терĕ. Раççее каялла тăвăракан капитала амнистилессине пĕлтернĕ пулин те, бизнес çак майпа усă курма васкамасть-мĕн. Импорта хамăрăн продукципе улăштармалли проектсене укçа хывма инвесторсем валли илĕртÿллĕ майсем çителĕклĕ. Ял хуçалăхĕпе çыхăннă сăмахсем те килĕшрĕç. Миллион-миллион гектар çĕре суха çаврăнăшне тавăрма, тÿрĕ кăмăлпа ĕçлемен хуçасенчен ял хуçалăх çĕрĕсене туртса илме, кам ĕçлесшĕн – лаптăксене аукцион урлă вĕсене сутма сĕнчĕ.
Юрий Тикинев,
Вăрнарти ачасемпе çамрăксен спорт шкулĕн тренер-преподавателĕ:
– Раççей Президенчĕ палăртнă тĕллевсем чăннипех те хавхалантараççĕ. Çынсен пурнăçĕн тăршшĕ вăрăмланни, Раççейре халăх йышĕ ÿссе пыни шанăç кÿрет. Çитес çултан Раççейĕн сывлăх сыхлавĕ туллин страховани принципĕсем çине куçнине пĕлтĕм. Страхлакан организацисен пациентсен прависене хÿтĕлемелле пулать. Чикĕ леш енчи ĕçтешсемпе çыхăну йĕркелессине, Раççей рынокне вăрахлăха килекен инвесторсене хапăл тунине ырлатăп. «Малалла утăпăр, пĕрле ăнăçу тăвăпăр», – терĕ Владимир Владимирович хăйĕн сăмахне вĕçленĕ май. Çапла, пĕрлехи вăйпа ĕçлесе пырсан ăнăçу пулать, палăртнă тĕллевсем те чăрмавсăрах пурнăçа кĕрĕç. Эпĕ аталану пуласса шанатăн.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии