09:11 02 декабря 2015 г.
Хăш-пĕрисем «ферма» сăмаха илтнĕ-илтмен тислĕк, çăрăлчăк теме пăхаççĕ. «Мураты» кооперативăн Уйкас Явăшри фермине пырса кĕрсессĕн вара тислĕк мар, утă шăрши сăмсана хытах кăтăкларĕ. Тĕлĕнмелле те, улăх-çарана лекнĕнех туйăнчĕ.
– Хамăр ĕç вырăнне тирпейлĕ тытма тăрăшатпăр,– терĕ Надежда Волкова. – Навуса çийĕнчех тасататпăр.
Фермăра та, кил хуçалăхĕнчи пекех, тирпейлĕ ĕçлеме тăрăшаççĕ уйкас-явăшсем. Выльăхĕсене те таса тытаççĕ. Надежда Волкова малтан дояркăра тăрăшнă, халĕ иккĕмĕш çул ĕнтĕ пăруламалли ĕнесене пăхать. Унăн кашни сăмахĕнченех хăйĕн ĕçне юратни курăнчĕ. Тепĕр тесен пурăннă тăрăхрах ĕç вырăнĕ пуррине мĕн çиттĕр? Акă ферма заведующийĕ Владимир Петров та çак ялтанах. Вăл агропромышленность комплексне аталантарассипе çирĕм çула яхăн вăй хурать. Пысăк пĕлÿллĕ специалист. 1993 çулта ял хуçалăх институтĕнчен вĕренсе тухнă, зоотехник специальноçне алла илнĕ. Владимир Петров бригадир, кладовщик ĕçĕсене те туса пырать.
«Мураты» кооперативра мăйракаллă шултра выльăх-чĕрлĕх 347 пуç тытаççĕ. Пĕлтĕр çак тапхăрта 295 пуç пулнă. Хушка пуçсем – 93 пуç. Сăвăм пысăк. Кунне вăтамран 1400 кг сĕт патшалăха сутаççĕ, 200 килограмне пăрусене çитереççĕ.
Выльăх-чĕрлĕх витисенче тĕплĕ юсав туса ирттернĕ. Пластик кантăксем харпăрлăхри çуртсенчен кая мар. Выльăх самăртмалли витене çĕнетсе улăштарнă. Хуçалăх хăйĕн нухратне 2,5 миллион тенкĕ тăкакланă. Хальхи вăхăтра фермăра вăй хуракансем валли санитари пÿлĕмне йĕркелессипе ĕçсем пыраççĕ. «Пирĕн хуçалăхра ĕç çыннисем хăйсене хăтлăхра туйччăр тесе тăрăшаççĕ»,– савăнса калаçрĕ Надежда Волкова.
Кооперативăн ĕç планĕсем пысăк. «Тепĕр çул пăрусене тытмалли çуллахи лагере хута яма палăртатпăр,– çирĕплетрĕ хуçалăх ертÿçи Геннадий Спиридонов. – Строительство материалĕсене туянтăмăр».
Кооперативра тăрăшакансем «Пирĕн девиз – малаллах» тесе ĕçлеççĕ, çавăнпа та «Мураты» хуçалăх аталану çулĕпе пырать.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии