15:07 27 ноября 2015 г.
Вăрнарти Ленин урамĕнчи 45-мĕш çуртра 12 тăлăха хваттер уççисемпе тивĕçтернине пĕлтернĕччĕ. Нумаях та вăхăт иртмерĕ – кунта пурăнакансенчен редакцие çивĕч сигнал çитрĕ: çанталăк сивĕтнĕ май пÿлĕмсен стенисем йĕпенсе хуралаççĕ иккен.
«Уйрăмах кĕтесри хваттерсенче. 4-мĕшĕнче акă стенасем йăлт йăлмакапа витĕннĕ. Кунта виçĕ пĕчĕк ачаллă çемье пурăнать. 7-мĕш хваттерте те çакнашкал ÿкерчĕкех, стенасене ятарласа шывпа сапнă тейĕн, урайĕнче шыв тăрать. Пулăшма ыйтатпăр», – тенĕ çырура.
Тăлăхсен çырăвне район администрацийĕн строительствăпа ЖКХ пайне ярса панă хыççăн нумай кĕттермерĕç, çийĕнчех туса хунă комиссипе («Вурнарская» МСО, опекăпа попечительство органĕн представителĕсене те кĕртнĕ) вырăна тухса тĕрĕслеве хутшăнма сĕнчĕç.
Чăн та, çырури йĕркесем ахаль çуралман. 4-мĕш хваттере кĕрсенех сăмсана нÿрĕк шăрши çапать. Кĕтессем йĕпе, обойсем хуралса ларнă. Кухньăра вĕсем йăтăнма пуçланă. Виçĕ пĕчĕк ачапа (кĕçĕнни тинтерех çуралнă) апатне те тăтăш пĕçермелле, кĕпи-йĕмне те çусах тăмалла. Комисси пыриччен кил хуçи хĕрарăмĕ кухньăри, ваннăйĕнчи вентиляци решеткисене пачах та уçман иккен.
Паллах, хваттер нÿрелнин сăлтавĕ кунта çеç мар. 7-мĕшĕнче те, ав, урамри стенасенчен урайне шыв пухăнать... Комисси хваттерсене кĕре-кĕре тухнă май ыйтусен хуравне тÿрех палăртрĕ. Чи малтанах, çуртра хальлĕхе икĕ çемье кăна тĕпленнĕ, комисси пынă чух, ноябрĕн 23-мĕшĕнче, хваттерĕсене те вĕсем кăна ăшăтса тăни паллă пулчĕ. Кунччен путвалти сывлăш «куçĕсене» те хупман, подъезд алăкĕ яланах уçă тăрать. Вĕсенчен кĕрекен сивĕ сывлăш, юнашарти, çÿлти, аялти хваттерсене ăшăтса тăманни çÿлерех асăннă хваттерсен стенисенче конденсат йĕркелет те.
«3-мĕш хваттерте ăшша ноябрĕн 22-мĕшĕнче, 8-мĕш хваттерте – ноябрĕн 23-мĕшĕнче «Вурнарская» МСО представителĕсем умĕнче янă. 5-мĕш хваттерте ăшă яма май çук, кунта пурăнакан газпа тивĕçтерме килĕшÿ çырман.
Нумай хваттерлĕ çуртра температура режимне тытса тăрасси кунта пурăнакансенчен килет. Сивĕ тапхăрта хутса ăшăтмасан хваттерти шыв тата ăшă системисем юрăхсăра тухаççĕ.
Стенасем кăмăскăланни сывлăш вентиляцийĕ çуккипе тата пÿлĕмре нÿрĕклĕх пысăк пулнипе çыхăннă. Вентиляци çук чухне шыв пăсĕ стенан, маччан е урайăн сивĕрех лаптăкĕсенче пухăнать», – пĕлтерет хуçалăхсем хушшинчи «Вурнарская» строительство организацийĕн директорĕ Иван Сандомиров редакцие çыру тĕлĕшпе янă официаллă хуравра.
Комисси тĕрĕслевĕ вăхăтĕнче кунашкал ыйту Чернышевский урамĕнчи тăлăх ачасем валли çĕкленĕ çуртра та пулнине палăртрĕ Иван Александрович. Хăшĕсем, пурăнманнисем, укçа тÿлес мар тесе, газ хуранĕсене е вуçех ĕçлеттермеççĕ е ячĕшĕн кăна хутаççĕ иккен. Çакă ыттисене шар кăтартать те.
Ятарлă программăпа çĕкленĕ çуртра икĕ хваттерĕнче çеç пурăнни те комисси членĕсенче ыйту çуратрĕ: «Енчен те хваттерсенче никам та пурăнмасть пулсан, вĕсемпе мĕншĕн тивĕçтермелле? Пурăнмалли кĕтессĕр нушаланакансем черетре татах пур вĕт...».
Çĕнĕ çурт ыйтуллă пулни çакăнтан та аван курăнчĕ. Ăна кăçалхи август уйăхĕнче йышăннă, анчах хальлĕхе тытса тăрас тĕлĕшпе яваплă организацие палăртман. Çурт умĕнчи çуп-çап контейнерĕ тахçанах тулса кайнă, ун тавра хÿмеленĕ лаптăкра та йăлари каяшсен пакечĕсем, сăра савăчĕсем илемсĕр йăванса выртаççĕ.
Комисси членĕсем хваттер хуçисемпе çивĕч калаçу ирттерчĕç, автономлă хутса ăшăтмалли çуртри правилăсене çирĕп пăхăнмаллине аса илтерчĕç.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии