14:30 13 ноября 2015 г.
Шалти ĕçсен органĕсен ĕçченĕн районта ирттернĕ уявĕнче наградăшăн пуринчен ытла хĕпĕртекенĕ, ахăртнех, пĕчĕк Катя пулчĕ. Вăл ашшĕ, Александр Смирнов полици старшини, сцена çинчен ансанах ун кăкăрне илемлетекен медальне тытса çавăра-çавăра пăхрĕ.
Хĕрачара çуралнă мăнаçлăх туйăмне ăнланма пулать. Ашшĕ ун, чăннипех те, – хăюллă, хăйĕн тивĕçне чунтан пурнăçлакан çын. II степень «Службăра палăрнăшăн» медалĕ форма çинче çирĕпленни те çакна яр уççăн кăтартать.
Тĕрĕссипе, уявра ку медалĕн II тата III степенĕсене пĕтĕмпе 17-ĕн илчĕç. Александр Смирновсăр пуçне полицин тĕрлĕ çăлтăрлă ĕçченĕсем – Александр Игнатьев, Альберт Ржанов, Дмитрий Косарев, Сергей Атюкин, Наталия Михнева, Инна Воробьева, Эльвира Татарова, Андрей Дмитриев, Станислав Семенов, Дмитрий Зайцев, Сергей Кириллов, Эдуард Алексеев, Александр Арсентьев, Сергей Семенов, Александр Обломов тата Юрий Муравьев.
«Вурнарский» пайĕн пуçлăхĕн тивĕçĕсене вăхăтлăха пурнăçлакан Андрей Сорокин наградăсене тыттариччен полици ĕçченĕсем (Вăрнар тата Элĕк районĕсемпе пĕтĕмпе 100-ĕн) саккунлăхпа йĕркелĕхе тивĕçтерессипе витĕмлĕ ĕçленине палăртрĕ. Вĕсен кăтартăвĕсем Раççей Шалти ĕçсен органĕсен пĕтĕмĕшле ырă тенденцине хывăннине пĕлтерчĕ. Пысăк пĕлтерĕшлĕ, массăллă мероприятисенче (кăçал – суйлавра, Аслă Çĕнтерĕвĕн 70 çулхи юбилейлă кунĕнче, Вăрнарти хутăш препаратсен завочĕн 85 çулхи юбилейĕнче) – яланах сыхă тăраççĕ.
Район администрацийĕн пуçлăхĕ Леонид Николаев Андрей Николаевич сăмахĕсене çирĕплетрĕ: муниципаллă влаçпа шалти ĕçсен органĕсем яланах тачă çыхăнса ĕçлеççĕ. «Преступноçе тĕппипе пĕтерейместĕн, анчах та вĕсен шутне чакарассипе çине тăрса ĕçлетĕр», – терĕ вăл табель пăшалĕпе сахалтарах усă курма сунса, кашни сотрудникăн ĕçĕ пай ăнăçăвĕ пулнине палăртса.
Район администрацийĕн Хисеп хучĕсене çак кун пиллĕкĕн илчĕç: участокри уполномоченнăй Александр Игнатьев, изолятор полицейски-водителĕ Дмитрий Косарев, ведомствăна пăхăнман хурал полицейскийĕсем Валерий Романов тата Алексей Одинцов.
Йĕрке хуралĕн ветеранĕсене те манмарĕç, полици пайĕ Василий Панькова, Валерий Наумова, Иулита Кольцована, Галина Христолюбована Тав хучĕсем пачĕ.
Каламалла, полици пайĕ «Çĕнтерÿ çулĕ» хаçатпа та тачă çыхăну тытать. «Вурнарский» пай сотрудникĕсенчен пурте тенĕ пек районти пичет изданине çырăнса илеççĕ, информаципе чылай тивĕçтереççĕ. Çак çыхăнăва район хаçачĕн тĕп редакторĕ Вячеслав Николаев малалла та тăсма ыйтрĕ, чи хастаррисене Хисеп грамотисемпе хавхалантарчĕ: полици пайĕн пуçлăхне Андрей Губанова, сотрудникĕсене Лилия Забирована, Ярослав Никифорова, Геннадий Казыкина тата ведомствăна пăхăнман хурал пуçлăхне Владимир Павлова.
Полици ĕçченĕсене Вăрнарти чиркÿ настоятелĕ Александр атте те лăпкă мар лару-тăрура чун çирĕплĕхне çухатмасăр ĕçлеме ăнăçу сунчĕ.
Ентешĕн, отставкăри полковникăн Валерий Кошкинăн йĕрке хуралçисен ячĕпе вăйлă сăвăсем çуралнă. Калининăри вăтам шкулти кадет класĕн ачисем вĕсене янраттарса вуларĕç.
Для нас Ваш отдел – символ мужества,
Вурнарцы – всегда высший класс!
Судьба, мы посмотрим, как сложится,
Служить мы готовы у Вас!..
Çавăн пекех вĕсем уяв «хуçисене» юрăсем, хăйсен вальсне халалларĕç.
Дознани енĕпе ĕçлекен Наташа Прокопьевапа районти культура çурчĕн ĕçченĕ Евгений Кудрявцев шăрантарнă юрăсем патриотлăхпа тулчĕç. Уява çавăн пекех «Тивлет» ансамбль юрри-ташши те илемлетрĕ.
АУ «Редакция Вурнарской районной газеты «Çĕнтерÿ çулĕ» («Путь Победы») Мининформполитики Чувашии